හිටපු පාර්ලිමේන්තු මන්ත්‍රීවරුන්, හිටපු පොලිස්පතිවරුන්, විශ්‍රාමික විනිසුරුවරුන්, විහාරස්ථාන කිහිපයක විහාරාධිපති හිමිවරුන්, බිෂොප්වරයකු සහ හිටපු ජනාධිපති ආර්යාවක ඇතුළු පුද්ගලයන් 454 දෙනකු සඳහා විශේෂ පොලිස් ආරක්ෂාව සපයා ඇති බව ඊයේ පාර්ලිමේන්තුවේදී අනාවරණය විය.

පාර්ලිමේන්තු මන්ත්‍රී කාවින්ද ජයවර්ධන වාචික පිළිතුරු අපේක්ෂාවෙන් යොමුකළ ප්‍රශ්නයකට පිළිතුරු වශයෙන් මහජන ආරක්ෂක අමාත්‍ය ආනන්ද විජේපාල විසින් සභාගත කරන ලද ලේඛනයක මේ බව සඳහන් වේ.

අනුරාධපුරය, කොළඹ සහ මහනුවර වැනි ප්‍රදේශවල විහාරස්ථානවල විහාරාධිපති හිමිවරුන් මෙන්ම මහනුවර කතෝලික බිෂොප්වරයා ද මෙලෙස විශේෂ පොලිස් ආරක්ෂාව ලබා දී ඇති පිරිස අතර වන බව එහි දැක්වේ.

එම ලේඛනයට අනුව විශේෂ පොලිස් ආරක්ෂාව ලබා දී ඇති සෙසු පිරිස් මෙසේය:

– හිටපු ජනාධිපති බිරිඳ – දිවංගත රණසිංහ ප්‍රේමදාස ජනාධිපතිවරයාගේ බිරිඳ වන හිටපු ජනාධිපති ආර්යාව හේමා ප්‍රේමදාස
– හිටපු පොලිස්පතිවරුන් – පූජිත් ජයසුන්දර, දේශබන්දු තෙන්නකෝන් සහ එන්. කේ. ඉලංගකෝන්
– හිටපු මන්ත්‍රීවරු – විනයාගමූර්ති මුරලිදරන් (කරුණා අම්මාන්), ඩග්ලස් දේවානන්දා, සරත් ෆොන්සේකා සහ එම්. ඒ. සුමන්තිරන්
– වෙනත් – සෙන්ට්‍රල් ෆිනෑන්ස් ආයතනයේ අධ්‍යක්ෂ මණ්ඩලයේ එක් සාමාජිකයකුට ද පොලිස් ආරක්ෂාව සපයා ඇත.

මීට අමතරව, ආණ්ඩු පක්ෂයේ පසුපෙළ මන්ත්‍රීවරුන් වන රුවන් විජේවීර, ඩබ්ලිව්. එච්. එම්. ධර්මසේන, අජිත් ශාන්ත ප්‍රියදර්ශන, එරංග සුබසිංහ සහ සරත් කුමාර යන අය මෙන්ම විපක්ෂයේ මන්ත්‍රී රංජිත් මද්දුම බණ්ඩාරට ද විශේෂ පොලිස් ආරක්ෂාව ලබා දී තිබේ.

ජනාධිපතිවරයා, අග්‍රාමාත්‍යවරිය, කැබිනට් අමාත්‍යවරුන්, මහානායක හිමිවරුන්, රාජ්‍යතාන්ත්‍රිකයන්, ශ්‍රේෂ්ඨාධිකරණ, මහාධිකරණ සහ දිස්ත්‍රික් උසාවි විනිසුරුවරුන්, මහේස්ත්‍රාත්වරුන් සහ ඇතැම් විශ්‍රාමික අධිකරණ නිලධාරීන්ට අමතරව මෙම පුද්ගලයන්ට ද විශේෂ පොලිස් ආරක්ෂාව සපයා ඇත.

අදාළ පුද්ගලයන්ට එල්ල වී ඇති තර්ජන පිළිබඳව සිදුකරන ලද ඇගයීම්වලින් (Threat Assessments) පසුව මෙම පොලිස් ආරක්ෂාව ලබා දී ඇති බව අමාත්‍යවරයා වැඩිදුරටත් සඳහන් කළේය.