December 17, 2024
රාජ්‍ය තාන්ත්‍රික සිදුවීම් මතු කර කඩාකප්පල්කාරී ක්‍රියාවන්හි නිරත වීමට විපක්ෂ කණ්ඩායම් උත්සාහ කරන බවට අගමැති හරිනි අමරසූරිය චෝදනා කරයි.
අධ්‍යාපන ක්ෂේත්‍රයේ පවතින ගැටලු විසඳීමට ගන්නා ක්‍රියාමාර්ග පිළිබඳ පාර්ලිමේන්තුවට කරුණු දක්වන අතරතුර අගමැතිවරිය මේ සම්බන්ධයෙන් කලකිරීම පළ කළාය.
“ඔබ දන්නා පරිදි 2025 වසර සඳහා සම්පූර්ණ පාසල් නිල ඇඳුම් අවශ්‍යතාව චීන රජයේ සහයෝගය ඇතිව ලබාදීමට රජය පියවර ගෙන තිබෙනවා. අවාසනාවකට අපි ප්‍රශ්න විසඳීමට වෙහෙස නොබලා කටයුතු කරන අතරේ විරුද්ධ කණ්ඩායම් අපේ උත්සාහය කඩාකප්පල් කිරීමට උත්සාහ කරනවා,” යැයි අමරසූරිය පැවසුවාය.
පසුගිය සතියේ දී චීන රජය විසින් පරිත්‍යාග කරන ලද පාසල් නිල ඇඳුම් ශ්‍රී ලංකාවේ චීන තානාපතිවරයා විසින් සංකේතාත්මකව ප්‍රදානය කිරීමේ උත්සවයකට තමා ප්‍රමාද වී පැමිණි බව වාර්තා වූ සිද්ධියක් ගැන සඳහන් කරමින් අගමැතිවරිය මේ බව කියා සිටියාය.
ඇතැම් මාධ්‍ය විසින් මෙම අවස්ථාවට ලබාදී ඇති ආවරණය සම්බන්ධයෙන් විවේචන එල්ල කළ ඇය එය රටවල් දෙකක් අතර ප්‍රශ්න ඇති කිරීමේ උත්සාහයක් බවට ද චෝදනා කළාය.
සන්ඩේ ටයිම්ස් පුවත්පත පසුගියදා වාර්තා කර තිබුණේ චීන තානාපති Qi Zhenhong ඉදිරියේ, චීනයේ පරම සතුරා වන තායිවානයට අගමැතිවරිය වැරදි ලෙස ස්තුති කළ බවයි.
“විපක්‍ෂය සහ ඔවුන් සමඟ පෙළ ගැසී සිටින ඇතැම් මාධ්‍ය ආයතන අපේ රජයේ අන්තර්ජාතික සබඳතා දුර්වල බවට හැඟීමක් ඇති කිරීමට උත්සාහ කරනවා. කෙසේවෙතත්, එවැනි සියලු උත්සාහයන් අඛණ්ඩව පරාජයට පත් වී තිබෙනවා,” යනුවෙන් ඇය පැවසුවාය.
මෙම සිදුවීම පිටුපස ඇති දේශපාලන අරමුණු පිළිබඳ අවබෝධයක් ලබා ගැනීම පිළිබඳ අමරසූරිය අගමැතිවරිය චීන රජයට සහ එහි තානාපතිවරයාට ස්තුතිය පුද කළාය.
ජනාධිපති අනුර කුමාර දිසානායකගේ ඉන්දීය රාජ්‍ය සංචාරයෙන් පෙන්නුම් කරන්නේ රජය අන්තර්ජාතික සබඳතා පවත්වාගෙන යෑමේ දී කෙතරම් සාර්ථක වී ඇත්ද යන්න බව අගමැතිවරිය වැඩිදුරටත් ප්‍රකාශ කළාය.
