August 16, 2025
සම සුදු පැහැ ගැන්වීමේ ක්‍රීම් වර්ග නිසා පීඩාවට පත්වන මෙරට රෝගීන් සංඛ්‍යාවේ ශීඝ්‍ර වැඩිවීමක් දක්නට ලැබෙන බව විශේෂඥ වෛද්‍ය දීප්ති ප්‍රනාන්දු පවසයි.
ජාතික විෂ වැළැක්වීමේ සතියේ ප්‍රගති සමාලෝචනය සහ අනාගත සැලසුම් පිළිබඳ පැවති මාධ්‍ය හමුවක් අමතමින් ඇය මෙම ප්‍රකාශය කළාය.
අගෝස්තු 11 සිට 17 දක්වා පැවැත්වෙන ජාතික විෂ වැළැක්වීමේ සතියේ මෙම වසරේ තේමාව වන්නේ ‘සම සුදු කිරීමේ ක්‍රීම් භාවිත කිරීමේ අනතුර’ යන්නයි.
සම මිනිස් සිරුරේ විශාලතම ඉන්ද්‍රිය බව පැහැදිලි කරමින් වෛද්‍ය ප්‍රනාන්දු අවධාරණය කළේ, සැමට බාහිරව සහ අභ්‍යන්තරව ආරක්ෂාව සපයන මෙලනින් වර්ණකය සම ආරක්ෂා කිරීමේ කාර්යයේදී වැදගත් කාර්යභාරයක් ඉටු කරන අතර සමේ වර්ණය තීරණය කරමින් පාරජම්බුල කිරණවලින් ශරීරය ආරක්ෂා කරන බවයි.
ශ්‍රී ලංකාව වැනි නිවර්තන රටවල සෞඛ්‍ය ආරක්ෂාව සඳහා මෙලනින් ඉතා වැදගත් බවත්, එමගින් සම වයසට යාම මන්දගාමී කරන බවත් වෛද්‍ය ප්‍රනාන්දු පෙන්වා දුන්නාය.
කෙසේවෙතත්, බොහෝ සම සුදු කිරීමේ ක්‍රීම්වල ස්ටෙරොයිඩ්, හයිඩ්‍රොක්විනෝන් සහ බැර ලෝහ වැනි හානිකර ද්‍රව්‍ය අඩංගු වේ.
මෙරට වෙළඳපොලේ පවතින නිෂ්පාදනවල ද රසදිය සහ ස්ටෙරොයිඩ් බහුලව දක්නට ලැබේ.
විශේෂයෙන් රසදිය මෙලනින් නිෂ්පාදනයට බාධා කරන බව වෛද්‍ය ප්‍රනාන්දු පැවසුවාය.
“මෙම බාධාව සෞඛ්‍ය ගැටළු රැසකට මඟ පාදනවා. මූලිකම අවදානම වන්නේ මෙලනින් නිෂේධනය කිරීම සහ මෙම ක්‍රීම්වලින් විෂ සහිත රසායනික ද්‍රව්‍ය ශරීරයට අවශෝෂණය කර ගැනීමයි. දිගු කාලීනව අවශෝෂණය වීමෙන් ස්නායු පද්ධතිය සහ වකුගඩු ක්‍රියාකාරිත්වය අඩාල විය හැකියි. ස්නායු ආබාධවලට මාංශ පේශි දුර්වලතාව ඇතුළත් වෙන්නත් පුළුවන්, ගර්භනී කාන්තාවක් රසදිය අඩංගු ක්‍රීම් භාවිත කළොත්, විෂ ද්‍රව්‍ය ඇගේ රුධිර ප්‍රවාහය හරහා කලලයට මාරු විය හැකියි. එමඟින් කලලයේ සංවර්ධන ප්‍රමාදයන් ඇති විය හැකියි. මව්කිරි දීමේදී පවා, මෙම විෂ ද්‍රව්‍ය දරුවාට සම්ප්‍රේෂණය විය හැකියි. ස්ටෙරොයිඩ් ඒ හා සමාන අවදානම් ඇති කරනවා. ඉහළ සාන්ද්‍රණයකින් යොදන විට, ඒවා නියාමනයකින් තොරව ශරීරයට අවශෝෂණය වෙනවා. මෙය සම තුනී කළ හැකියි, දිගුකාලීන භාවිතයත් සමඟ දියවැඩියාව ඇතිවීමේ අවදානම වැඩි කළ හැකියි”, යනුවෙන් වෛද්‍ය ප්‍රනාන්දු තවදුරටත් අනාවරණ කළාය.
