මෙරට කූට ආනයනකරුවන් කිහිපදෙනකු කෘත්‍රිමව පිරිපහදු කළ ශරීරයට අතිශයින්ම අහිතකර තෙල් කිලෝ කෝටි 8000ක් පොල්තෙල් නමින් වෙළෙඳපොළට මේ වසරේදී නිකුත් කර ඇතැයි සමස්ත ලංකා පාරම්පරික පොල්තෙල් නිෂ්පාදකයන්ගේ සංගමයේ කැඳවුම්කරු බුද්ධික ද සිල්වා පැවැසීය.

විෂ තෙල් ආනයනය සදහා එම ආනයනකරුවන් ඇමරිකානු ඩොලර් විශාල ප්‍රමාණයක් වැයකර ඇතැයි පැවසූ හෙතෙම මෙය සමාජ සමූල ඝාතනයකට යටත් වන මහ මිනීමැරුමකැයිද ප්‍රකාශ කළේය.

ඔහු මෙසේ පැවසුවේ කොළඹදී පෙරේදා(30) පැවති ප්‍රවෘත්ති සාකච්ඡාවකදීය.

රසායනිකව පිරිපහදු කරන ලද ආනයනික කෘත්‍රිම තෙල් අත්‍යවශ්‍ය ආහාර ද්‍රව්‍යයක් ලෙස සළකා වැට් බද්දෙන් නිදහස් කර, දේශීය පොල්තෙල්කරුවන්ගේ පොල්තෙල් කිලෝවකට රජය රුපියල් 160 ක වැට් බද්දක් අයකිරීම අසාධාරණ බවත් බුද්ධික ද සිල්වා පැවසීය.

දූෂිත ආනයනකරුවන්ට ලබාදී ඇති බදු සහන වහාම ඉවත් කර පෙර තිබූ රුපියල් 350ක බද්ද නැවත ස්ථාපනය කරන ලෙසත්, දේශීය ස්වභාවික පොල්තෙල් කර්මාන්ත නිපැයුම් වැට් බන්දෙන් නිදහස් කරන ලෙසත් කැඳවුම්කරු රජයෙන් ඉල්ලීමක් කරයි.

විෂ තෙල් ආනයනය කරන පුද්ගලයන්ට එරෙහිව දැඩි ලෙස නීතිය ක්‍රියාත්මක කිරීමට පොල් සංවර්ධන අධිකාරිය පාරිභෝගික අධිකාරිය සහ සෞඛ්‍ය අධිකාරියට නියෝග නිකුත් කරන ලෙසත් ඔහු ඉල්ලා සිටී.

බුද්ධික ද සිල්වා මහතා මෙසේද පැවසීය.

“ස්වාභාවික නාමය හරහා ගෙන්වන මෙම තෙල් තැන්පත් කරන්නේ කොළඹ රජයේ ටැංකි කිහිපයක. තෙල් ජාවාරම්කරුවන්ට එක්තරා දේශපාලකයකුත් සම්බන්ධයි. විකෘති තෙල් ආනයනය සම්බන්ධයෙන් ජාවාරම්කරුවන්ට නඩු කීපයකුත් තියෙනවා.”(ලංකාදීප)