අධිවේගී මාර්ගයන්හි මගී බස් රථවල ගමන් කරන මගීන් විසින් ආසන පටි පැළඳීම අනිවාර්ය කරන රෙගුලාසි අඩංගු ගැසට් නිවේදනයක් අගෝස්තු 31 වැනිදා නිකුත් කිරීමට නියමිත බව ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක පැවසීය.

අමාත්‍ය රත්නායක මේ බව ප්‍රකාශ කළේ පාර්ලිමේන්තුවේ පසුගියදා පැවති ප්‍රවාහන, මහාමාර්ග, වරාය සහ සිවිල් ගුවන් සේවා පිළිබඳ අමාත්‍ය උපදේශක කාරක සභා රැස්වීමේදීය.

තවදුරටත් පැහැදිලි කරමින් අමාත්‍යවරයා සඳහන් කළේ මෙම මුලපිරීම ‘ක්ලීන් ශ්‍රී ලංකා’ වැඩසටහනේ ප්‍රධාන අංගයක් ලෙස ක්‍රියාත්මක කරන බවයි.

පාසල් ප්‍රවාහන බස් රථ, කාර්යාල ප්‍රවාහන සේවා, විවේක චාරිකා බස් රථ සහ අධිවේගී මාර්ගවල ධාවනය වන අනෙකුත් මගී බස් රථවල ආසන පටි සවි කිරීම සඳහා ආසන්න වශයෙන් මාස තුනක සහන කාලයක් ලබා දෙන බව ද ඔහු සඳහන් කළේය.

මීට පෙර රුපියල් 2,000ක් පමණ වූ ආසන පටිවල මිල දැන් රුපියල් 5,000ත් 7,000ත් අතර ප්‍රමාණයකට ඉහළ ගොස් ඇති බව අමාත්‍යවරයා තවදුරටත් පෙන්වා දුන්නේය.

මෙම මිල වැඩිවීම පාරිභෝගික කටයුතු අධිකාරිය විසින් නිරීක්ෂණය කළ යුතු බව ඔහු අවධාරණය කළේය.

දුර ගමන් බස් රථවල ආසන පටි අනිවාර්ය කිරීම සම්බන්ධයෙන් මහජන අදහස් විමසා ඇති බවත්, ප්‍රතිචාර දැක්වූ සියලු දෙනාම පාහේ මෙම පියවරට සහාය පළ කළ බවත් ඔහු සඳහන් කළේය.

ඒ අනුව, නුදුරු අනාගතයේ දී දුර ගමන් බස් රථ සඳහා ද මෙම නියාමනය ක්‍රියාත්මක කිරීමට රජය සැලසුම් කරයි.

මෙම සමීක්ෂණය ‘සිට්‍රා නවෝත්පාදන රසායනාගාරය’ විසින් පවත්වා තිබූ අතර, මගීන්, රියදුරන් සහ පෞද්ගලික බස් හිමියන් ඇතුළු පුද්ගලයන් 2,100ක ගෙන් පමණ දත්ත රැස් කර තිබේ.

මෙම දත්ත මත පදනම් වූ වාර්තාවක් ද එම සංවිධානය විසින් ඉදිරිපත් කර ඇත.

අවශ්‍ය නීතිමය සංශෝධන සමඟ, අධිවේගී මාර්ගවල වාහන ධාවනයට අවසර දීමට පෙර වාහන අමතර කොටස්වල තත්ත්වය පරීක්ෂා කර ශ්‍රේණිගත කිරීම සඳහා නව ක්‍රමයක් හඳුන්වා දෙන බව ද අමාත්‍යවරයා නිවේදනය කළේය.

අදාළ ගැසට් නිවේදනය නියමිත වේලාවට නිකුත් කෙරේ.

අවශ්‍ය ආරක්ෂක ප්‍රමිතීන් සහ පිරිවිතරයන්ට අනුකූල නොවන ටයර් සහිත වාහන අධිවේගී මාර්ගවල ධාවනයට අවසර නොදෙන බව ඔහු තවදුරටත් අවධාරණය කළේය.

ත්‍රිරෝද රථ සහ වෑන් රථ ධාවනය කරන රියදුරන් ඇතුළු පෞද්ගලික ප්‍රවාහන අංශයේ රියදුරන් සඳහා සුභසාධන අරමුදලක් පිහිටුවීමට අවශ්‍ය කටයුතු අවසන් කර ඇති බව ද අමාත්‍යවරයා අනාවරණ කළේය.

මේ සම්බන්ධ පනත් කෙටුම්පතක් නුදුරු අනාගතයේ දී අනුමැතිය සඳහා පාර්ලිමේන්තුවට ඉදිරිපත් කෙරේ.

අධිවේගී මාර්ගවල ධාවනය වන දුර ගමන් බස් රථ නැවැත්වීම සඳහා නිසි යාන්ත්‍රණයක් නිර්මාණය කිරීම පිළිබඳව ද කමිටුව සාකච්ඡා කළේය.

මීට අමතරව, දුම්රිය සේවා යාවත්කාලීන කිරීම සහ වරාය යටිතල පහසුකම්වල අවශ්‍ය වැඩිදියුණු කිරීම් පිළිබඳ යෝජනා සහ නිර්දේශ ඉදිරිපත් කිරීමට රැස්වීමේදී උප කමිටු දෙකක් පත් කරන ලදී.

මෙම උප කමිටු සඳහා සාමාජිකයන් ද නම් කෙරිණි.

තවද, සැප්තැම්බර් මාසයේ ආරම්භ කිරීමට නියමිත කඩවත-මීරිගම අධිවේගී මාර්ග කොටසේ ඉදිකිරීම් පිළිබඳව ද සාකච්ඡා කරන ලදී.

පාර්ලිමේන්තු මන්ත්‍රීවරුන් විසින් මතු කරන ලද ගැටළු ද එහිදී සැළකිල්ලට ගත් අතර, අදාළ නිර්දේශ ලබා දෙන ලදී.