පිටියේ විනිසුරුවරයකු ලෙස ඊයේ සිය 100 වැනි එක්දින තරගයට සහභාගී වූ රුචිර පල්ලියගුරුගේට ශ්‍රී ලංකා ක්‍රිකට් ආයතනය උපහාර දැක්වීය.

මෙම අවස්ථාව සනිටුහන් කිරීම සඳහා පැවති උපහාර උත්සවයට ශ්‍රී ලංකා ක්‍රිකට් ආයතනයේ උප සභාපති රවීන් වික්‍රමරත්න සහභාගී විය.

ක්‍රිකට් ක්ෂේත්‍රයේ ඔහුගේ සේවාවන් සහ ජයග්‍රහණ වෙනුවෙන් උපහාරයක් ලෙස ශ්‍රී ලංකා ක්‍රිකට් ආයතනය වෙනුවෙන් ඔහු පල්ලියගුරුගේට විශේෂ සමරු ඵලකයක් ප්‍රදානය කළේය.

ICC තරඟ තීරක ඇන්ඩි පයික්‍රොෆ්ට්, ICC එලයිට් පැනල් විනිසුරු අලහුද්දීන් පලකර්, සහ ICC අන්තර්ජාතික පැනල් විනිසුරුවරුන් වන රවීන්ද්‍ර විමලසිරි සහ අසිෆ් යාකොබ් ද මෙම අවස්ථාව සනිටුහන් කිරීමට සහභාගී වූහ.

පල්ලියගුරුගේ 2011 අගෝස්තු 6 වැනි දින ශ්‍රී ලංකාව සහ ඕස්ට්‍රේලියාව අතර පල්ලේකැලේ හිදී T20 අන්තර්ජාතිකර තරගයක විනිසුරු ලෙස කටයුතු කරමින් අන්තර්ජාතික විනිසුරුවරයෙකු ලෙස සිය ගමන ආරම්භ කළේය.

සතියකට පසු, 2011 අගෝස්තු 14 වැනි දින, ඔහු නැවතත් ශ්‍රී ලංකාව සහ ඕස්ට්‍රේලියාව සමඟ ඔහුගේ පළමු එක්දින තරගයට සහභාගී විය.

ඔහුගේ වෘත්තීය ජීවිතයේ කැපී පෙනෙන සිදුවීමක් වූයේ ඕස්ට්‍රේලියාවේ පැවති කීර්තිමත් ICC පිරිමි ක්‍රිකට් ලෝක කුසලානය සඳහා සාමාජිකයන් 20 දෙනෙකුගෙන් යුත් විනිසුරු මණ්ඩලයේ අයෙකු ලෙස තෝරා ගැනීමයි.

2016 ආසියානු කුසලාන ශූරතාවලියේ අවසන් මහා තරගය විනිශ්චය කිරීමත් සමඟ ඔහුට තවත් කැපී පෙනෙන ජයග්‍රහණයක් ලැබිණි.