ඇමරිකා එක්සත් ජනපදය, ඉරානය සමඟ යහපත් ගිවිසුමකට එළඹෙනු ඇති බව හෝ වෙනත් ක්‍රමයකින් එම රට සමඟ කටයුතු කරනු ඇති බව රාජ්‍ය ලේකම් මාර්කෝ රුබියෝ සඳහන් කළේය. ඔහු මේ බව කියා සිටියේ මාස තුනක් තිස්සේ පවතින මෙම යුද්ධයේදී කඩිනම් විසඳුමක් ලැබෙනු ඇතැයි යන බලාපොරොත්තු වොෂින්ටනය විසින් අවම කරමින් සිටින පසුබිමකය.

ඉන්දියාවේ සංචාරයක නිරත වී සිටින රූබියෝ නවදිල්ලියේදී මාධ්‍යවේදීන් අමතමින් කියා සිටියේ, වෙනත් විකල්ප වෙත යොමු වීමට පෙර රාජ්‍ය තාන්ත්‍රික ප්‍රයත්නයන් සාර්ථක කර ගැනීමට උපරිම අවස්ථාව ලබා දෙන බවයි.

ඉරාන ගිවිසුමකට එළඹීම සඳහා කඩිනම් නොවන ලෙස තමන් තම නියෝජිතයන්ට දැනුම් දුන් බව ජනාධිපති ඩොනල්ඩ් ට්‍රම්ප් විසින් ඉකුත් ඉරිදා ප්‍රකාශ කිරීමෙන් අනතුරුව ඔහු මෙම අදහස් පළ කළේය.

“නාවික සමුද්‍ර සන්ධිය විවෘත කිරීමට ඔවුන්ට ඇති හැකියාව, එය විවෘත කර ගැනීම සහ න්‍යෂ්ටික ගැටලුව සම්බන්ධයෙන් නිශ්චිත කාල රාමුවකට යටත් වූ, ඉතා සැබෑ මෙන්ම සැලකිය යුතු මට්ටමේ සාකච්ඡාවකට එළඹීම සම්බන්ධයෙන් සෑහෙන ස්ථිර යෝජනාවක් මේ වන විට මේසය මත තිබෙනවා. අපට එය සාර්ථක කර ගැනීමට හැකි වනු ඇතැයි බලාපොරොත්තු වෙනවා,” යනුවෙන් එහිදී රුබියෝ පැවසීය.

ඊට පෙර දින, ට්‍රම්ප් සිය Truth Social ගිණුමේ සටහනක් තබමින් කියා සිටියේ, ගිවිසුමකට එළඹ, එය සහතික කර, අත්සන් තබන තුරු හෝමූස් සමුද්‍ර සන්ධියේදී ඉරාන නැව්වලට පනවා ඇති ඇමරිකානු අවහිර කිරීම් ඒ අයුරින්ම ක්‍රියාත්මක වන බවයි.

ඔහු තවදුරටත් කියා සිටියේ, දෙපාර්ශවයම ප්‍රමාණවත් කාලයක් ගෙන මෙය නිවැරදිව සිදු කළ යුතු බවයි.

මේ පිළිබඳව ඉරාන රජයෙන් මෙතෙක් කඩිනම් ප්‍රතිචාරයක් ලැබී නොමැත. කෙසේ වෙතත්, ඉරාන විප්ලවීය බලකායට සම්බන්ධ Tasnim පුවත් ඒජන්සිය වාර්තා කළේ, තහනම් කර ඇති තම අරමුදල් නිදහස් කරන ලෙස ටෙහෙරානය කරන ඉල්ලීම ඇතුළු විභව ගිවිසුමක ඇතැම් කොටස් සඳහා ඇමරිකාව තවමත් බාධා පමුණුවමින් සිටින බවයි.

මේ අතර, ඇමරිකාව සහ ඉරානය සාම ගිවිසුමකට සමීප වෙමින් පවතින බවට ඇති වූ බලාපොරොත්තු සහගත තත්ත්වයත් සමඟ, සඳුදා දිනයේදී ලෝක වෙළඳපොළේ බොරතෙල් මිල 6% කින් පහත වැටී සති දෙකක කාලයක් තුළ වාර්තා වූ අවම අගය සනිටුහන් කළේය.