ජනතා විමුක්ති පෙරමුණ විසින් ඝාතනය කළ බව කියන එක්සත් ජාතික පක්ෂයේ සාමාජිකයන්, නායකයන්, වෘත්තීය සමිති ක්‍රියාකාරීන්ගේ නම් ඇතුළත් ලැයිස්තුවක් පාර්ලිමේන්තු මන්ත්‍රී රෝහිණී කුමාරි විජේරත්න අද පාර්ලිමේන්තුවට ඉදිරිපත් කළාය.

දේශපාලන ප්‍රචණ්ඩත්වයට ගොදුරුවූවන්ගේ ලේඛන පාර්ලිමේන්තුවට ඉදිරිපත් කිරීමට රජය කටයුතු කරන අතරතුර, පාර්ලිමේන්තු සැසිවාරයේදී ඇය එම නම් 1300ක් ඇතුළත් ලැයිස්තුව ඉදිරිපත් කළාය.

තවද මෙම වින්දිතයන්ගේ පවුල්වල සාමාජිකයන් 900 කට අධික සංඛ්‍යාවකගේ නම්ද පාර්ලිමේන්තු මන්ත්‍රී රෝහිණී විජේරත්න විසින් පාර්ලිමේන්තුවට ඉදිරිපත් කළාය.

“ළමා සොල්දාදුවන් එල්.ටී.ටී.ඊ.යටත් කළින් නිර්මාණය කළේ ජනතා විමුක්ති පෙරමුණයි. ඒකට හොඳම උදාහරණය තමයි ‘කන්තලේ බෝනික්කි’ වයස අවුරුදු 70ක එජාප කාන්තාවක් ඝාතනය කිරීමට යොදාගත් 13 හැවිරිදි දරුවා.” ඇය පැවසුවාය.

ජනතා විමුක්ති පෙරමුණ විසින් තවත් එක්සත් ජාතික පාක්ෂිකයන් කිහිපදෙනකු ළමුන් යොදාගනිමින් ඝාතනය කළ බවට ඇය චෝදනා කළාය.

එමෙන්ම ඇය කියාසිටියේ, අප්‍රේල් මාසයේ පැවැත්වීමට නියමිත “බටලන්ද විවාදයේදී” වත්මන් ලැයිස්තුවට ඇතුළත් නොවන නම්ද ඉදිරිපත් කරන බවයි.

විපතට පත් පවුලේ සාමාජිකයන් සිටී නම් ඒ පිළිබඳ අමතර තොරතුරුද මෙම දීර්ඝ වාර්තාවට ඇතුළත් කරන ලෙසද මන්ත්‍රීවරිය සිය ෆේස්බුක් පිටුව ඔස්සේ මහජනතාවට ආරාධනා කර සිටියි.