සවුදි අරාබියේදී මරණ දඬුවම නියම වී ඇති බවට වාර්තා වන ශ්‍රී ලාංකිකයකු වන අනෝජන් සිවරාසාගේ, කල්මුණේ නාර්පිට්ටිමුනෙයි හි පිහිටි නිවස වෙත ගිය හිටපු අමාත්‍ය සහ සමස්ත ලංකා මක්කල් කොංග්‍රසයේ නායක රිෂාඩ් බදියුදීන් සැප්තැම්බර් 18 වැනි දින ඔහුගේ පවුලේ හමුව තිබේ.

එම සංචාරයේදී අනෝජන්ගේ මව, සහෝදර සහෝදරියන් ඇතුළු පවුලේ පිරිස හමුවූ බදියුදීන්, ඔවුන් වෙත සිය සහයෝගය පළ කළ අතර මෙම සිද්ධිය සම්බන්ධයෙන් අදාළ බලධාරීන් සමඟ සාකච්ඡා කිරීමට පියවර ගන්නා බවට සහතික වී ඇත.

ඔහුගේ මාධ්‍ය ඒකකය නිකුත් කළ නිවේදනයකට අනුව බදියුදීන් සඳහන් කර ඇත්තේ, මෙම මරණ දඬුවම පිළිබඳ වාර්තාව ශ්‍රී ලාංකික මුස්ලිම් ප්‍රජාව අතර ද දැඩි කම්පනයක් ඇති කර ඇති බවයි.

අනෝජන්ගේ තත්ත්වය සම්බන්ධයෙන් ජනාධිපති අනුර කුමාර දිසානායකගෙන් සහ සෞදි අරාබියේ රාජ්‍ය නායකයාගෙන් හදිසි ඉල්ලීමක් කිරීම සඳහා මුස්ලිම් පාර්ලිමේන්තු මන්ත්‍රීවරුන් එකමුතු කිරීමට තමා බලාපොරොත්තු වන බව ඔහු පවසා ඇත.

එමෙන්ම අනෝජන් නිදහස් කරගැනීම සඳහා සෞදි රජයෙන් ඉල්ලීමක් කිරීමට මැදිහත් වන ලෙස සමස්ත ලංකා ජමියතුල් උලමා සංවිධානයෙන් ද ඉල්ලා සිටින බව බදියුදීන් වැඩිදුරටත් පවසා තිබේ.

මෙම හමුවේදී අනෝජන්ගේ පවුලේ අය ප්‍රකාශ කර ඇත්තේ, ඔහු නිදහස් කරගැනීමේ ප්‍රයත්නයන් සඳහා මුස්ලිම් ප්‍රජාවගේ පූර්ණ සහයෝගය ලැබෙනු ඇතැයි තමන් බලාපොරොත්තු වන බවයි.

තමන් සහ මුස්ලිම් ප්‍රජාවේ සාමාජිකයන් ඔවුන්ගේ කණගාටුව තේරුම් ගන්නා බවත්, අනෝජන්ට උපකාර කිරීමේ කටයුතුවලට අඛණ්ඩව සහාය දක්වන බවත් බදියුදීන් පවුලේ අයට සහතික වී ඇත.

ඊට අමතරව පාර්ලිමේන්තු මන්ත්‍රීවරුන් වන ගජේන්ද්‍රකුමාර් පොන්නම්බලම්, ශානක්කියන් රාසමානික්කම් සහ මනෝ ගනේෂන් යන මහත්වරුන් ද දුරකථනයෙන් තමා හා සම්බන්ධ වී මෙම කාරණය පිළිබඳව සාකච්ඡා කළ බව ඔහු හෙළිකර ඇත.

අනෝජන්ගේ සිද්ධිය සම්බන්ධයෙන් ඉදිරි පියවර ගැනීම සඳහා කණ්ඩායමක් ලෙස එක්ව කටයුතු කිරීමට ඔවුන් බලාපොරොත්තු වන බවද ඔහු පවසා තිබේ.

කෙසේවෙතත්, මෙම මරණ දඬුවම නියම වීම සම්බන්ධයෙන් ශ්‍රී ලංකා විදේශ කටයුතු අමාත්‍යාංශය මගින් මෙතෙක් නිල වශයෙන් තහවුරු කර නොමැත.