පාලන මිලට සහල් අලෙවි කිරීම සම්බන්ධයෙන් සහල් මෝල් හිමියන් අතර කිසියම් බෙදීමක් පවතින බව පෙනී ගොස් තිබේ.

ඇතැමුන් පාලන මිලට සහල් සැපයීමට එකඟ වුවත් තවත් සමහරු එය ප්‍රතික්ෂේප කර ඇත්තේ ඉන් තමන්ට පාඩු සිදුවන බව පවසමිනි.

නාඩු වී කිලෝග්‍රෑමයක් රුපියල් 122කට මිලදී ගැනීමටත් සහල් කිලෝග්‍රෑමයක් රුපියල් 220කට අලෙවි කිරීමටත් නොහැකි බව ප්‍රමුඛ පෙළේ සහල් මෝල් හිමියකු වන ඩඩ්ලි සිරිසේන පසුගිය සෙනසුරාදා (28) පැවසීය.

පොළොන්නරුව දිස්ත්‍රික්කයේ සහල් නිෂ්පාදකයන් සහ සමස්ත ලංකා සහල් මෝල් හිමියන්ගේ සංගමය එක්ව පාලන මිලට සහල් ලබාදීමට තීරණය කළේ අනුර කුමාර දිසානායක ජනාධිපතිවරයාගේ වැඩපිළිවෙළට සහාය දැක්වීමටය.

වෙළඳපොලේ පවතින නාඩු සහල් හිඟයට හේතු වී ඇත්තේ නාඩු වී නිෂ්පාදනයේ දුර්වලතාව බව ඔහු පෙන්වා දුන්නේය.

ගොවීන් නාඩු වී වගාව අඩු කර ඇති බවත්, වී වගා කරන්නන්ගෙන් සියයට 80කට වැඩි ප්‍රමාණයක් කීරී සම්බා වගාවට යොමුව ඇති බවත් ඔහු පැවසීය.

ආදායම වැඩි කර ගැනීම සඳහා ඔවුන් මෙම ක්‍රියාමාර්ගය ගෙන ඇති බව කියා සිටි ඔහු වී වගාවේ මෙම අසමතුලිතතාව වළක්වා ගැනීමේ අවශ්‍යතාව අවධාරණය කළේය.

මේ අතර, මහා පරිමාණ සහල් නිෂ්පාදක ඩඩ්ලි සිරිසේනගේ ප්‍රකාශයට එකඟ නොවන බවත් පාලන මිලට සහල් අලෙවි කළ නොහැකි බවත් මරඳගහමුල සමස්ත ලංකා මධ්‍ය හා කුඩා පරිමාණ සහල් වෙළෙඳුන්ගේ සංගමය ඊයේ මාධ්‍ය වෙත ප්‍රකාශ කළේය.

ඩඩ්ලි සිරිසේනගේ ප්‍රකාශය අනුව කටයුතු කළහොත් සුළු හා මධ්‍ය පරිමාණ සහල් මෝල් හිමියන් සහ සහල් ව්‍යාපාරිකයන් දැඩි අසීරුතාවකට පත්වන බව මරඳගහමුල සහල් ව්‍යාපාරික සංගමයේ සභාපති බී.කේ.රංජිත් පැවසීය.

දැනට වී මිල රුපියල් 130ත් 132ත් අතර පවතින බවත්, අධික පාඩු ලබමින් පාලන මිලට සහල් අලෙවි කිරීමට නොහැකි බවත් ඔහු පෙන්වා දුන්නේය.

ගොවීන් අධික පොලියට පෞද්ගලික ණය දෙන්නන්ගෙන් ණය ලබාගෙන ඇති බවත්, එම ණය පියවීමට මාර්ගයක් නොමැතිව ගොවීන් අසරණ වන බවත් ඔහු පැවසීය.

සහල් මිල ස්ථීර ලෙස පහත හෙළීම සඳහා ඵලදායී යාන්ත්‍රණයක් සකස් කරන ලෙස සමස්ත ලංකා මධ්‍ය හා කුඩා පරිමාණ සහල් වෙළෙඳුන්ගේ සංගමයේ සභාපතිවරයා රජයෙන් ඉල්ලා සිටියේය.