ත්‍රිකුණාමලයේ බුද්ධ ප්‍රතිමා සිද්ධිය සම්බන්ධයෙන් බෞද්ධ භික්ෂූන් ඇතුළු දසදෙනෙකු අත්අඩංගුවට ගෙන අඛණ්ඩව රක්ෂිත බන්ධනාගාරගත කිරීම සම්බන්ධයෙන් සියම් මහා නිකායේ කෝට්ටේ ශ්‍රී කලයාණි සාමග්‍රි ධර්ම මහා සංඝ සභාවේ ප්‍රධාන සංඝනායක අතිපූජ්‍ය ආචාර්ය ඉත්තෑපාන ධම්මාලංකාර හිමියන් කනස්සල්ල පළකර තිබේ.

ඒ අනුව, මහා නාහිමියන් ජනාධිපති අනුර කුමාර දිසානායක වෙත ලිපියක් යොමුකර ඇත.

ත්‍රිකුණාමලයේ සිද්ධිය සම්බන්ධයෙන් බෞද්ධ භික්ෂූන් ඇතුළු පුද්ගලයන් දසදෙනෙකු රක්ෂිත බන්ධනාගාරගත කිරීම පිළිබඳව එම ලිපියේ කනස්සල්ල පළකර ඇත.

භික්ෂූන් වහන්සේලා ඓතිහාසිකව පුරාණ රජවරුන් විසින් ආරක්ෂා කරන ලද සහ බුද්ධ ශාසනයට කැපකරන ලද ඉඩමක බුද්ධ ප්‍රතිමාව තැන්පත් කර ඇති බවත්, වෙනත් කිසිදු වරදක් නොකර, ප්‍රතිමාව තැන්පත් කිරීමේදී පමණක් ඔවුන්ට චෝදනා එල්ලකර ඇති බවත් එම ලිපියේ තවදුරටත් සඳහන් වේ.

ලිපියට අනුව, සුළු සිදුවීමක් ලෙස විස්තර කර ඇති එම කරුණ මත පදනම්ව පෙර නොවූ විරූ ආකාරයේ චෝදනා ගොනුකර ඇත.

රාජ්‍ය මැදිහත්වීම සහිතව භික්ෂූන්ට එරෙහිව ගනු ලැබූ ක්‍රියාමාර්ග බුද්ධ ශාසනයට එරෙහිව හිතාමතාම සිදුකරන ලද බරපතල වරදක් බව පූජ්‍ය ඉත්තෑපාන ධම්මාලංකාර හිමියන් ජනාධිපතිවරයා වෙත යැවූ ලිපියේ සඳහන් කර ඇත.

භික්ෂූන් වහන්සේලා ඇතුළු දසදෙනා නිදහස් කිරීම සඳහා වහාම පියවර ගන්නා ලෙස ද මහානාහිමියන් ජනාධිපතිවරයාගෙන් ඉල්ලා ඇත.