විනිසුරුවරුන්ගේ විශ්‍රාම යෑමේ වයස දීර්ඝ කිරීමට රජය ගෙන ඇති යෝජනාව හේතුවෙන් අධිකරණයේ ස්වාධීනත්වයට සහ අපක්ෂපාතීත්වයට හානිවිය හැකි බවට හිටපු ජනාධිපති රනිල් වික්‍රමසිංහ අනතුරු අඟවයි.

කොළඹ සිනමන් ග්‍රෑන්ඩ් හෝටලයේදී පැවැත්වුණු ‘රනිල් සමඟ කියවමු’ (Read with Ranil) තරුණ සංවාද මණ්ඩපය අතරතුර නැඟුණු ප්‍රශ්නයකට පිළිතුරු දෙමින් වික්‍රමසිංහ කියාසිටියේ මෙම යෝජනාවට නීති ක්ෂේත්‍රය තුළින් දැඩි විරෝධයක් එල්ල වෙමින් පවතින බවයි.

නීති ක්ෂේත්‍රයේ බහුතරයක් මෙන්ම විනිසුරුවරුන් ද විශ්‍රාම වයස අවුරුදු 65න් ඔබ්බට දීර්ඝ කිරීමට විරුද්ධ බව පෙන්වාදුන් රනිල් වික්‍රමසිංහ, මෙම යෝජනාව ඉදිරියට ගෙනයෑමට වැඩි උනන්දුවක් දක්වන්නේ රජය බව ද සඳහන් කළේය.

“මේ වන විට මේ සම්බන්ධයෙන් විශාල මතභේදයක් පවතිනවා. මෙතරම් විරෝධයක් එල්ල වෙද්දී රජය මේ සඳහා කොපමණ දුරක් යාමට සූදානම්ද යන්න ප්‍රශ්නයක්. රජය මේ සඳහා බලපෑම් කරන තරමට, ඔවුන් අධිකරණයේ අපක්ෂපාතීත්වය අවදානමට ලක්කරනවා විය හැකියි.”
යැයි ඔහු සඳහන් කළේය.

අවසාන තීරණය රජය සතු වුවද, මෙම යෝජනාව ක්‍රියාත්මක කිරීමට යෑමෙන් දේශපාලන හා දේශපාලන නොවන අංශ දෙකෙන්ම එල්ල වන විරෝධය තවදුරටත් දැඩි විය හැකි බවට ඔහු අනතුරු ඇඟවීය.

“ඔවුන්ට මෙය ඉදිරියටම ගෙනයෑමට අවශ්‍ය නම්, දේශපාලන මෙන්ම දේශපාලන නොවන ක්ෂේත්‍රවලින්ද මීට වඩා වැඩි විරෝධයක් මතුවනු ඇතැයි මම සිතනවා” යැයි ඔහු පැවසීය.

ජාතික තරුණ පෙරමුණේ ‘Smart UNP’ ඒකකය විසින් සංවිධානය කරන ලද ‘නව ලෝක අනුපිළිවෙල: භූදේශපාලනය, ආර්ථික මාරුවීම් සහ ශ්‍රී ලංකාවේ අනාගතය’ යන තේමාව යටතේ පැවැත්වුණු සමාරම්භක ‘රනිල් සමඟ කියවමු’ සංවාදයේදී හිටපු ජනාධිපතිවරයා මෙම අදහස් පළකළේය.