August 8, 2025
රටේ අධ්‍යාපන ක්‍රමයේ සිදුවෙමින් පවතින සහ ඉදිරියේදී සිදුකිරීමට නියමිත ප්‍රතිසංස්කරණ සඳහා සහයෝගය ලබා ගැනීමට සහ අදහස් ලබා ගැනීමට අග්‍රාමාත්‍ය ආචාර්ය හරිනි අමරසූරිය, බෞද්ධ හා කතෝලික ආගමික නායකයන් සමඟ වෙන වෙනම සාකච්ඡා පවත්වමින් සිටී.
ඒ යටතේ පූජ්‍ය මහාචාර්ය තුම්බුල්ලේ සීලක්ඛන්ද හිමියන්ගේ ප්‍රධානත්වයෙන් සමස්ත ලංකා ශාසනාරක්ෂක බල මණ්ඩලයේ සාමාජිකයන් සමඟ අරලියගහ මන්දිරයේ පැවති රැස්වීමකදී, දහම් පාසල් මුහුණ දෙන අභියෝග කෙරෙහි අවධානය යොමු වී තිබිණි.
ඉරිදා සහ පෝය දිනවල උපකාරක පන්ති නැවැත්වීමේ අවශ්‍යතාව, දහම් පාසල් විභාග දිනවල පාසල් විභාග සහ ක්‍රීඩා තරඟ කාලසටහන්ගත කිරීම වැළැක්වීම, ගුරු හිඟය පියවීම සහ අවශ්‍ය ඉගෙනුම් ද්‍රව්‍ය සැපයීම වැනි කරුණු ද සාකච්ඡා කර තිබේ.
ධර්මාචාර්ය විභාග සමත් සිසුන්ට විශ්වවිද්‍යාල ප්‍රවේශය සඳහා අමතර ලකුණු ලබා දීම සහ දහම් අධ්‍යාපනයේ ව්‍යුහය සහ වටිනාකම තවදුරටත් වැඩිදියුණු කිරීම සඳහා වන යෝජනා පිළිබඳව ද අග්‍රාමාත්‍යවරිය සාකච්ඡා කර ඇත.
බෞද්ධ කටයුතු නියෝජ්‍ය අමාත්‍ය ගමගෙදර දිසානායක, අග්‍රාමාත්‍ය ලේකම් ප්‍රදීප් සපුතන්ත්‍රි සහ බෞද්ධ කටයුතු කොමසාරිස් ජනරාල් කේ.ඩබ්ලිව්. වෙලහැර යන පිරිස ද එම අවස්ථාවට සහභාගී වූහ.
අග්‍රාමාත්‍ය අමරසූරිය කොළඹ අගරදගුරු නිල නිවසේදී අති උතුම් මැල්කම් කාදිනල් රංජිත් හිමිපාණන් සහ ජ්‍යෙෂ්ඨ බිෂොප්වරුන් හමුවී ඊයේ හමු වී 2026 සිට ක්‍රියාත්මක කිරීමට නියමිත ඉදිරි අධ්‍යාපන ප්‍රතිසංස්කරණ පිළිබඳව සාකච්ඡා කළාය.
රැස්වීම අතරතුර, ජාතික සංවර්ධනයට ඔවුන්ගේ දායකත්වය ලබා දීමේ අරමුණින්, ප්‍රධාන ධාරාවේ අධ්‍යයන පද්ධතියෙන් පිටත සිටින සිසුන් තුළ සදාචාරාත්මක වටිනාකම් ඇති කිරීම සහ වෘත්තීය මාර්ග ලබා දීම කෙරෙහි ප්‍රතිසංස්කරණවල අවධානය ඇය අවධාරණය කළාය.
කෘෂිකර්මාන්තය, ධීවර කර්මාන්තය, විදුලි ඉංජිනේරු විද්‍යාව සහ මෝටර් රථ අලුත්වැඩියාව වැනි ක්ෂේත්‍රවල වෘත්තීය පුහුණුව සෘජුවම පාසල් තුළ ඒකාබද්ධ කිරීම සැලසුම්වලට ඇතුළත් වේ.
අධ්‍යාපන ලේකම් නාලක කළුවැව සමඟ එක් වූ අග්‍රාමාත්‍යවරිය, විශේෂඥ ගුරුවරුන් බඳවා ගැනීම සහ තේරීම් ක්‍රියාවලිය විධිමත් කිරීම තුළින් ගුණාත්මක අධ්‍යාපනය සහතික කිරීම සඳහා වන පියවර ද ගෙනහැර දැක්වූවාය.
ශ්‍රී ලංකාවේ කතෝලික රදගුරු සම්මේලනයේ සභාපති අති උතුම් හැරල්ඩ් ඇන්තනි සහ අනෙකුත් කතෝලික බිෂොප්වරු මෙම සැසියට සහභාගී වූහ.
