ජනාධිපති අනුර කුමාර දිසානායක අද නිවේදනය කළේ, හිටපු ජනාධිපතිවරුන්ට ලබා දී ඇති සියලුම නිල නිවාස රජය විසින් නැවත ලබාගන්නා බවයි.

මේ සම්බන්ධයෙන් අදහස් දක්වමින් ඔහු හෙළි කළේ, ඉඩම් වටිනාකම හැර, හිටපු ජනාධිපති මහින්ද රාජපක්ෂගේ නිවසේ කුලිය මසකට රුපියල් මිලියන 4.6 ක් බවයි.

හිටපු ජනාධිපතිවරුන්ට නිවාසවලින් ඉවත්වීමට හෝ කුලිය තමන් විසින්ම ගෙවීමට විකල්පයක් ඇති බව ඔහු ප්‍රකාශ කළේය.

“පවතින නීතිවලට අනුව, හිටපු ජනාධිපතිවරුන්ට නිවසක් හෝ ඔවුන්ගේ වැටුපෙන් 1/3 ක් හිමිවෙනවා. රජය දැන් මෙම ප්‍රතිලාභය රුපියල් 30,000 ක මුදල් දීමනාවකට සීමාකරනවා. එය ඔවුන්ගේ වැටුපෙන් 1/3 ක්” යනුවෙන් කටුකුරුන්දේ පැවති රැස්වීමක් අමතමින් ජනාධිපතිවරයා පැවසීය.

කොළඹ ජනාධිපති මන්දිරය, මහනුවර ජනාධිපති මන්දිරය සහ අරලියගහ මන්දිරය හැර අනෙකුත් සියලුම අමාත්‍ය බංගලා හෝටල් ව්‍යාපෘති හෝ වෙනත් සුදුසු භාවිතයන් සඳහා භාවිත කරන බව ඔහු තවදුරටත් පැවසීය.