මැයි දින සංවිධාන කටයුතු වෙනුවෙන් පැවති රැස්වීමක දී රනිල් වික්‍රමසිංහ ජනාධිපතිවරයා කිරීමට එක්වන ලෙස යෝජනා කරන්නට ගිය ගම්පහ දිස්ත්‍රික් පාර්ලිමේන්තු මන්ත්‍රි ප්‍රසන්න රණවීරට රැස්වූ ශ්‍රී ලංකා පොදුජන පෙරමුණේ ගම්පහ ප්‍රදේශයේ ප්‍රාදේශීය දේශපාලකයන්ගෙන් දැඩි විරෝධයක් එල්ල වී ඇති බව දේශපාලන ආරංචි මාර්ග පවසයි.

රනිල් වික්‍රමසිංහ හැර පොහොට්ටුවට වෙනත් විකල්පයක් නැති බව කියමින් දැඩි ස්ථාවරයක සිටින ප්‍රසන්න රණතුංග අනුව යමින් ඔහු මෙම ප්‍රකාශය සිදුකර ඇතැයි පැවැසේ.

බියගම ප්‍රදේශයේ හෝටලයක දී ඊයේ (07) පැවති මෙම සාකච්ඡාවට ශ්‍රී ලංකා පොදුජන පෙරමුණේ ප්‍රබලයන්වන රෝහිත අබේගුණවර්ධන, සාගර කාරියවසම්, ආනන්ද ගණේපොල ඇතුළු කණ්ඩායමක් එක්වී ඇත.

මේ අවස්ථාවට ගම්පහ දිස්ත්‍රික්කයේ ප්‍රාදේශීය මට්ටමේ දේශපාලකයන් 300ක් පමණ එක් වී සිටි බව ද වාර්තා වේ.

සිය කතාව අතරතුර රනිල් හැර වෙනත් විකල්පයක් නැතැයි ප්‍රසන්න රණවීර පැවසීමෙන් පසු සභාවෙන් ඔහුට දැඩි විරෝධයක් එල්ල වී ඇත.

“රනිල්ට වැඩකරන ලෙස අපට කියන්නේ රෙද්දක් ඇඳගෙනදැයි” පාක්ෂිකයන් ප්‍රසන්න රණවීරගෙන් ප්‍රශ්න කර තිබේ.

“පොහොට්ටුවෙන් පඹයෙක් දාන්න. අපි වැඩකරන්නම්. ඒත් රනිල්ට වැඩ කරන්න කියලා කියන්න මෙහෙම රැස්වීම් තියන්න එපා” යනුවෙන් ඔවුන් ප්‍රකාශ කර ඇති බව වැඩිදුරටත් වාර්තා වේ.