October 22, 2026
ආරක්ෂක, වෙළඳ, නැගී එන තාක්ෂණයන් සහ උපායමාර්ගික ක්ෂේත්‍රයන්හි සහයෝගීතාව තවදුරටත් ශක්තිමත් කරගැනීමේ අරමුණින් ඉන්දීය අග්‍රාමාත්‍ය නරේන්ද්‍ර මෝදි සහ පෝලන්ත අග්‍රාමාත්‍ය ඩොනල්ඩ් ටස්ක් අතර විශේෂ ද්විපාර්ශ්වික සාකච්ඡා බ්‍රහස්පතින්දා ආරම්භ වීමට නියමිතය.
තෙදින නිල සංචාරයක් සඳහා බදාදා සවස නවදිල්ලි නුවරට පැමිණි පෝලන්ත අග්‍රාමාත්‍යවරයාව ගුවන්තොටුපළේදී පිළිගනු ලැබුවේ ආහාර සැකසුම් කර්මාන්ත සහ ජල ශක්ති රාජ්‍ය අමාත්‍ය රාජ් භූෂන් චෞධරි විසිනි.
මෙම සංචාරය සඳහා පෝලන්ත මුදල් හා ආර්ථික අමාත්‍ය ඇන්ඩ්‍රෙජ් ඩොමන්ස්කි ඇතුළු ඉහළ පෙළේ ව්‍යාපාරික නියෝජිත පිරිසක් ද එක්ව සිටිති.
මෙම නායක හමුවේදී දෙරටටම වැදගත් වන කලාපීය සහ ගෝලීය ආරක්ෂක වර්ධනයන්, දැනට පවතින රුසියානු-යුක්‍රේන අර්බුදය මෙන්ම ඉන්දියා-යුරෝපීය සංගම් සබඳතා පිළිබඳව ද දීර්ඝ ලෙස අදහස් හුවමාරු කර ගැනීමට නියමිතය. මීට අමතරව ආරක්ෂක නිෂ්පාදන, අභ්‍යවකාශ පර්යේෂණ, පුනර්ජනනීය බලශක්තිය සහ නවීන තාක්ෂණික ක්ෂේත්‍රයන්හි ප්‍රගතිය උදෙසා එක්ව කටයුතු කිරීම පිළිබඳව ද මෙහිදී විශේෂ අවධානයක් යොමු කෙරෙනු ඇත.
පෝලන්ත නායකයාගේ පැමිණීම සනිටුහන් කරමින් ඉන්දීය විදේශ කටයුතු අමාත්‍යාංශය සඳහන් කළේ, මෙම සංචාරය හරහා දෙරට අතර පවතින චිරස්ථායී සබඳතා තවදුරටත් තහවුරු වන අතර ඉන්දියා-පෝලන්ත උපායමාර්ගික සහයෝගීතාවට නව පණක් ලැබෙන බවයි.
මේ අතර, සංචාරයේ නිරත පෝලන්ත අග්‍රාමාත්‍යවරයා සහ ඉන්දීය විදේශ කටයුතු අමාත්‍ය එස් ජයශංකර් ද විශේෂ සාකච්ඡාවක් පැවැත්වීමට නියමිතව තිබේ.
