May 6, 2024
අවාර සමයේදී දේශීය වන්දනාකරුවන්ට සහ සංචාරකයන්ට ශ්රී පාදයට පැමිණීම තහනම් කිරීම සම්බන්ධයෙන් මෙතෙක් විධිමත් දැනුම්දීමක් ලැබී නොමැති බව පොලිස් දෙපාර්තමේන්තුව පවසයි.
සිරිපා අවාර සමය වෙසක් පුර පසළොස්වක පොහොය දිනයෙන් ආරම්භ වීමට නියමිතය.
දේශීය වන්දනාකරුවන් සහ සංචාරකයන් ශ්රී පාදස්ථානය අවට පරිසර පද්ධතියට හානි කරන බැවින් අවාරයේ ශ්රී පාද වන්දනාව තහනම් කිරීමට තීරණය කර ඇති බව ශ්රී පාදස්ථානාධිපති හිමි පූජ්ය බෙංගමුවේ ධම්මදින්න හිමියන් පසුගියදා ප්රකාශ කළ බව වාර්තා විය.
එම ප්රකාශයෙන් පසු එවැනි තීරණයක් ගැනීමට බලය ඇත්තේ කාටද යන්න පිළිබඳ සමාජ මාධ්ය වේදිකාවල දිගින් දිගටම සංවාදයක් ඇතිවෙමින් පැවතිණි.
බොහෝ දෙනා යෝජනා කරන්නේ ධම්මදින්න හිමියන්ට ශ්රී පාදය පිළිබඳ තීරණ ගතහැකි නමුත් අවට පරිසර පද්ධතිය සම්බන්ධයෙන් තීරණ ගැනීමට උන්වහන්සේට බලයක් නොමැති බවයි.
මෙම ගැටලුව සම්බන්ධයෙන් පොලිස් මාධ්ය ප්රකාශක, නියෝජ්ය පොලිස්පති නිහාල් තල්දූව පවසන්නේ මෙම කාරණය තවමත් සාකච්ඡාවේ පවතින අතර අවසන් තීරණයක් ගෙන නොමැති බව නල්ලතන්නිය පොලිස් ස්ථානයේ ස්ථානාධිපතිවරයා දැනුම්දුන් බවයි.
ශ්රී පාද වන්දනා වාරය අවසන් කිරීම පිළිබඳ සාකච්ඡා කිරීම සඳහා අදාළ රාජ්ය නිලධාරීන් සහ අනෙකුත් පාර්ශ්වකරුවන් සමඟ පසුගියදා රැස්වීමක් පවත්වා තිබේ.
එම රැස්වීමේදී මෙම කරුණ ඉදිරිපත් කර ඇති බව වාර්තා වේ.
පැමිණ සිටි පිරිස එකගතාවකට එළැඹ ඇති නමුත්, එවැනි ලිඛිත දැනුම්දීමකින් තොරව පොලිසියට ශ්රී පාදය තරණය කිරීම වැළැක්විය නොහැකි බව පොලිසිය පවසයි.
බෞද්ධයන් ඇතුළු ආගම් කිහිපයක් අදහන අයගේ ගෞරවාදරයට පාත්ර වූ ආගමික ස්ථානයක් වන ශ්රී පාදය දේශීය මෙන්ම අන්තර්ජාතික පසුබිම්වලින් පැමිණෙන අමුත්තන්ගේ ආකර්ෂණයට ලක්වූ ස්ථානයකි.
විශාල ජනකායක් ශ්රී පාදය නැරඹීමට පැමිණීම හේතුවෙන් අවට පරිසර පද්ධතියට සිදුවන පාරිසරික බලපෑම පිළිබඳ වසර ගණනාවක් තිස්සේ අඛණ්ඩ සංවාදයක් පවතී.
