නිල ලියාපදිංචි අංක තහඩු නිකුත් කිරීමේ ප්‍රමාදයක් පැවතියද, විකෘති කරන ලද හෝ ප්‍රමිතියෙන් තොර අංක තහඩු සවිකර ඇති වාහන ධාවනය නොකරන ලෙස පොලිසිය රියදුරන්ට අනතුරු ඇඟවීමක් කර තිබේ.

ගමනාගමන පාලන හා මාර්ග ආරක්ෂාව පිළිබඳ භාර නියෝජ්‍ය පොලිස්පති ඩබ්ලිව්.පී.ජේ. සෙනෙවිරත්න ප්‍රකාශ කළේ, නිල අංක තහඩු මෙතෙක් නිකුත් කර නොමැති වුවද, වෙනස් කරන ලද හෝ විකෘති කරන ලද අංක තහඩු සහිත වාහන ධාවනය කිරීම නීත්‍යානුකූල නොවන බවයි.

කෙසේවෙතත්, මෝටර් රථ ප්‍රවාහන දෙපාර්තමේන්තුව විසින් නිකුත් කරන ලද මාර්ගෝපදේශවලට අනුකූලව, වාහන අංකය A4 ප්‍රමාණයේ කඩදාසියක මුද්‍රණය කර ප්‍රදර්ශනය කිරීමට රියදුරන්ට අවසර ඇති බව ඔහු සඳහන් කළේය.

සැපයුම්කරුවකු නොමැති වීම හේතුවෙන් මෝටර් රථ ප්‍රවාහන දෙපාර්තමේන්තුව විසින් වාහන අංක තහඩු නිකුත් කිරීම මාස 10 කට ආසන්න කාලයක් තිස්සේ අත්හිටුවා තිබිණි.

වාර්තාවලට අනුව මෙහි ප්‍රතිඵලයක් ලෙස අංක තහඩු 400,000 කට ආසන්න ප්‍රමාණයක හිඟයක් නිර්මාණය වී ඇත.

ලබන ජුනි මස 10 වැනිදා හෝ ඊට පෙර නිල අංක තහඩු නිකුත් කිරීමේ කටයුතු නැවත ආරම්භ කිරීමට අපේක්ෂා කරන බව බලධාරීහු පවසති.

මේ අතර, මෙලෙස තාවකාලිකව හෝ ප්‍රමිතියෙන් තොරව සකස් කරන ලද අංක තහඩු ප්‍රදර්ශනය කරන වාහන සඳහා පොලිසිය විසින් දඩ පැනවීම පිළිබඳව රියදුරන් සිය නොසතුට පළකර තිබේ.

මේ සම්බන්ධයෙන් අදහස් දක්වමින් පොලිසිය කියාසිටියේ, අනුමත ප්‍රමිතීන්ට අනුකූල නොවන අංක තහඩු භාවිත කරන වාහන හිමියන්ට එරෙහිව නීතිමය පියවර ගැනීමට පොලිසියට අයිතියක් පවතින බවයි.