නවදිල්ලි නුවර පැවැත්වෙන බ්‍රික්ස් රාජ්‍ය නායක සමුළුවට සහභාගී වීම සඳහා සහ ඉන්දීය අග්‍රාමාත්‍ය නරේන්ද්‍ර මෝදි සමඟ සාකච්ඡා පැවැත්වීම සඳහා රුසියානු ජනාධිපති ව්ලැදිමීර් පුටින් මේ සතිය අගදී ඉන්දියාවේ සංචාරයක නිරත වීමට නියමිත බව ක්‍රෙම්ලිනයේ මාධ්‍ය ප්‍රකාශක දිමිත්‍රි පෙසකොව් නිවේදනය කළේය.

ජනාධිපති පුටින්ගේ සංචාරයට පෙර ඉන්දීය මාධ්‍යවේදීන් ඇමතූ පෙසකොව් සඳහන් කළේ, දෙරටේ නායකයන් ද්විපාර්ශ්වික සබඳතා සහ වත්මන් ගෝලීය ගැටලු පිළිබඳව සාකච්ඡා කිරීමට නියමිත අතර, රුසියානු ජනාධිපතිවරයා විසින් යුක්‍රේන අර්බුදයේ වත්මන් තත්ත්වය පිළිබඳව ද අගමැති මෝදි දැනුවත් කරනු ඇති බවයි.

‘ස්පුට්නික් ඉන්දියා’ ආයතනය සංවිධානය කළ මාර්ගගත මාධ්‍ය හමුවකට මොස්කව් නුවර සිට එක්වෙමින් පෙසකොව්, දෙරට සහ දෙරටේ නායකයන් අතර පවතින සමීප සබඳතාව අවධාරණය කළේය.

ජනාධිපති පුටින් සහ අගමැති මෝදි අතර සබඳතාව ප්‍රායෝගික එකක් ලෙස හැඳින්වූ ඔහු, නායකයන් දෙපළ ගෝලීය සහ ද්විපාර්ශ්වික සබඳතාවලට අදාළ කරුණු විවෘත සහ නිර්මාණාත්මක අයුරින් සාකච්ඡා කරන බව ද පැවසීය.