පොල් සහ තැඹිලි වගාවන්හි සුදු මැස්සන් ව්‍යාප්තවීම පාලනය කිරීම සඳහා කෘෂිකර්ම දෙපාර්තමේන්තුව මගින් ‘Encarsia Guadeloupe’ නම් පරපෝෂිතයන් අඩංගු පැකට් ලක්ෂ 3කට අධික සංඛ්‍යාවක් මේ වසරේ බෙදාහැර බව පොල් වගා කිරීමේ මණ්ඩලය පවසයි.

මේ වන විට ප්‍රදේශ කිහිපයක පොල් වගාවන්ට සුදු මැස්සන්ගේ හානිය නිරීක්ෂණය වෙමින් පවතින බව කෘෂිකර්ම දෙපාර්තමේන්තුව වාර්තා කළේය.

කෙසේවෙතත්, බස්නාහිර පළාතේ සහ තවත් ප්‍රදේශ කිහිපයකට වර්ෂාපතනය හේතුවෙන් මෙම හානිය තරමක් දුරට අඩුවී තිබේ.

සුදු මැස්සන් කහ පැහැයට වැඩි වශයෙන් ආකර්ෂණය වන අතර, සාමාන්‍ය පොල් වතුවලට වඩා තැඹිලි වගාවන්ට වැඩි හානියක් සිදු කරයි.

මේ වන විට සුදු මැස්සන්ගේ බලපෑමට ලක් වූ පොල් සහ තැඹිලි ගස් 1,051,323කට ප්‍රතිකාර කර ඇත.

සුදු මැස්සන්ගේ හානිය පොල් අස්වැන්න සැලකිය යුතු ලෙස අඩු වී ඇති අතර එය පසුගිය වසරේ විශාල අඩුවීමක් ඇති කළේය.

මෙම ගැටළුව විසඳීම සඳහා පොල් වගා කිරීමේ මණ්ඩලය විසින් දියර ඉසින යන්ත්‍ර 700ක් ලබා දී ඇති අතර පොල් වගාකරුවන් දැනුවත් කිරීමේ වැඩසටහන් 3,046ක් පවත්වා ඇත.

2024 වසරේ දී ගොවීන් වෙත පොල් පැළ ලක්ෂ 20ක් බෙදා හැරීමටද සැලසුම් කර ඇත.

මේ වන විට ඉන් පොල් පැළ ලක්ෂ 8ක් බෙදා දී ඇත.

මීට අමතරව, වගාකරුවන්ට තැඹිලි පැළ 11,401ක් ලබා දී ඇති අතර, තවත් පැළ ලබාගැනීම සඳහා බීජ 23,233ක් තවාන්වල සිටුවා ඇත.