වර්ධනය වන වියදම් සපුරාලීම සඳහා විදේශ ප්‍රේෂණ සහ මූල්‍ය ආධාර මත යැපීම වැඩි වූ බැවින්, පකිස්ථානුවන් සිය ආදායමෙන් තුනෙන් දෙකක්ම මූලික අවශ්‍යතා දෙකක් සඳහා පමණක් වියදම් කරන බව පාකිස්තාන රජයේ නවතම සමීක්ෂණයකින් අනාවරණ වී තිබේ.

අදාළ සමීක්ෂණය අනුව එම වියදම් වන්නේ ආහාර සහ විදුලිය යි.

සැලසුම් අමාත්‍ය අහ්සාන් ඉක්බාල් විසින් නිකුත් කරන ලද 2024-25 ගෘහස්ථ ඒකාබද්ධ ආර්ථික සමීක්ෂණයට අනුව, වත්මන් ආර්ථික පීඩනය සහ ජීවන වියදම ඉහළ යාම හේතුවෙන් ආදායම්වලට වඩා වියදම් වේගයෙන් ඉහළ ගොස් තිබේ.

උද්ධමනය මිනිසුන් වෙහෙස මහන්සි වී උපයාගත් මුදල් සූරා කෑමට ලක් කර ඇති ආකාරය එමගින් පිළිබඳව පෙන්වා දී ඇති අතර, අධ්‍යාපනය වැනි අවශ්‍යතා සඳහා වියදම් කිරීමට ජනතාව සතුව ඇත්තේ 2.5% ක් පමණක් බව ද අනාවරණ වී තිබේ.

අධ්‍යාපනය සඳහා වියදම් කිරීම නිවාස පිරිවැයෙන් අඩකටත් වඩා අඩු විය.

සමීක්ෂණයට අනුව, ගෘහස්ථ ආදායමේ විදේශ ප්‍රේෂණවල කොටස 5% ට අඩු සිට 8% කට ආසන්න දක්වා ඉහළ ගොස් ඇත. ප්‍රදාන සහ ආධාරවල දායකත්වය ද 4.6% දක්වා දෙගුණයකටත් වඩා වැඩි වී ඇති අතර, එය “අවිධිමත් ආධාරක ජාල මත වැඩි යැපීමක් පෙන්නුම් කරයි” යනුවෙන් නිල වාර්තාවේ සඳහන් විය.

ස්වාධීන විශේෂඥයින්ට අනුව, සීමිත රැකියා අවස්ථා හේතුවෙන් විරැකියාව ඉහළ ගොස් ඇති අතර පාකිස්තානයෙන් තරුණ හා දක්ෂ පුද්ගලයින් රටින් පිටව යාම හේතුවෙන් බුද්ධි ගලනය ද කැපී පෙනෙන ලෙස ඉහළ ගොස් තිබේ.