බ්‍රසීලය, රුසියාව, ඉන්දියාව, චීනය සහ දකුණු අප්‍රිකාව යන නැගී එන ආර්ථිකයන්ගෙන් සමන්විත ‘බ්‍රික්ස්’ (BRICS) සංවිධානයේ සාමාජිකත්වය ලබා ගැනීම සඳහා පාකිස්තානය 2023 වසරේදී අයදුම් කළේය.

ඊජිප්තුව, ඉතියෝපියාව, ඉරානය සහ එක්සත් අරාබි එමීර් රාජ්‍යය යන රටවල් හතර පසුගිය වසරේදී නව සාමාජිකයන් ලෙස බ්‍රික්ස් සංවිධානයට ඇතුළත් කර ගනිමින් එය ‘බ්‍රික්ස් ප්ලස්’ (BRICS+) ලෙස පුළුල් වුවද, මෙම කණ්ඩායම තුළ නවදිල්ලියට පවතින නිෂේධ බලය හේතුවෙන් ඉස්ලාමාබාද් වෙත තවදුරටත් සාමාජිකත්වය අහිමි වී තිබේ.

බ්‍රික්ස් සාමාජිකත්වය ලබා ගැනීම සඳහා අයදුම් කර ඇති තවත් රටවල් 29 අතරට පාකිස්තානයද අයත් වන අතර, එම උත්සාහය පිටුපස ප්‍රධාන වශයෙන්ම පවතින්නේ රට මුහුණ දී සිටින ආර්ථික අභියෝගයි.

පාකිස්තාන ආර්ථික සමීක්ෂණයට අනුව, එරට දළ දේශීය නිෂ්පාදිතයේ වර්ධන වේගය සටහන්ව ඇත්තේ සියයට 3.70ක් ලෙසය.

ලෝක බැංකුව සහ ජාත්‍යන්තර මූල්‍ය අරමුදල මත පවතින යැපීම අවම කර ගැනීම සහ මූල්‍ය විකල්ප පුළුල් කර ගැනීම සඳහා බ්‍රික්ස් සංවිධානයට අනුබද්ධ නව සංවර්ධන බැංකුවේ ඇමෙරිකානු ඩොලර් මිලියන 580ක කොටස් හිමිකාරීත්වයක් පාකිස්තානය විසින් මිලදී ගෙන ඇති බව Nikkei Asia වාර්තාවක් සඳහන් කරයි. ගෝලීය දකුණ නියෝජනය කරන ප්‍රමුඛ සංවිධානයක් ලෙස මෙම සමූහය ලබන පිළිගැනීමත් සමඟම පාකිස්තානයේ අයදුම්පත ඉදිරිපත් වීමද යෙදී තිබුණි.

පුළුල් කරන ලද මෙම නව සංවිධානය වර්තමානය වන විට ලෝක ජනගහනයෙන් සියයට 49ක් පමණ සහ මිලදී ගැනීමේ ශක්ති සමානාත්මතා පදනම මත ගෝලීය දළ දේශීය නිෂ්පාදිතයෙන් සියයට 40ක් පමණ නියෝජනය කරයි.

බ්‍රික්ස් සංවිධානයේ සාමාජික රටවල් සමඟ ඉන්දියාව සිදුකරන වෙළඳ කටයුතු ද වේගයෙන් වර්ධනය වී තිබේ. ඒ අනුව එම සාමාජික රටවල් වෙත ඉන්දියාව සිදුකළ අපනයන ප්‍රමාණය ඇමෙරිකානු ඩොලර් බිලියන 64.3 සිට ඩොලර් බිලියන 95.7 දක්වා සියයට 48.8 කින් කැපී පෙනෙන ලෙස ඉහළ ගොස් ඇත.

මේ අතර, 2023 නොවැම්බර් මාසයේදී පැවැති මාධ්‍ය හමුවකදී පාකිස්තාන විදේශ කටයුතු අමාත්‍යාංශයේ ප්‍රකාශකයා සඳහන් කර සිටියේ, ගෝලීය දකුණ නියෝජනය කරන මෙම ප්‍රමුඛ සංසදයට එක්වීමට පාකිස්තානය අපේක්ෂා කරන බවයි.

බ්‍රික්ස් සංවිධානයේ සාමාජික රටවල් බොහෝමයක් සමඟ පාකිස්තානය සතුව සමීප සබඳතා පවතින බවද ඔහු එහිදී වැඩිදුරටත් සඳහන් කළේය.