පළාත් පාලන මැතිවරණය සහ ජනාධිපතිවරණය කැඳවා තිබියදී සංවර්ධන ව්‍යාපෘති ලෙස රජය විසින් පවත්වාගෙන යනු ලබන බව කියන වෙස්වලාගත් දේශපාලන ප්‍රවර්ධන වැඩසටහන් සම්බන්ධයෙන් අවධානය යොමු කරන ලෙස නිදහස් හා සාධාරණ මැතිවරණයක් සඳහා වූ ජනතා ක්‍රියාකාරීත්වය හෙවත් පැෆ්රල් සංවිධානය මැතිවරණ කොමිෂන් සභාවෙන් ඉල්ලා සිටී.

මැතිවරණ කොමිෂන් සභා සභාපති ආර්.එම්.ඒ.එල්. රත්නායක වෙත යවන ලද ලිපියක පැෆ්රල් සංවිධානයේ විධායක අධ්‍යක්ෂ රෝහණ හෙට්ටිආරච්චි පෙන්වා දුන්නේ පළාත් පාලන මැතිවරණය දින නියමයක් නොමැතිව කල් දමා ඇතත් මැතිවරණය අවලංගු කර නොමැති බැවින් අදහස් වන්නේ පූර්ව මැතිවරණ නීති තවමත් ක්‍රියාත්මක වන බවයි.

විශේෂයෙන්ම ව්‍යවස්ථාව අනුව මේ වසරේ අගෝස්තු මාසයේදී ප්‍රකාශයට පත්කළ හැකි ඉදිරි ජනාධිපතිවරණය සමග දේශපාලන බලධාරීන් විසින් සැලසුම් සහගත සංවර්ධන ව්‍යාපෘති ක්‍රියාත්මක කිරීමෙන් දේශපාලන පක්ෂ සහ අපේක්ෂකයන්ට අසාධාරණ වාසි අත්විය හැකි බව ද ඔහු අවධාරණය කර තිබේ.

විමධ්‍යගත අයවැය වැඩසටහන 2024 යටතේ 2024 දී නිම කිරීමට නියමිත සියලුම සංවර්ධන ව්‍යාපෘති ජූලි 31 වන විට අවසන් කරන ලෙස දිස්ත්‍රික් ලේකම්වරුන්ට උපදෙස් දෙමින් මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය විසින් නිකුත් කරන ලද බව කියන MF/02/2023 අංකය සහිත චක්‍රලේඛයක් ඔහු මෙම ලිපියෙන් පෙන්වා දී ඇත.

වසරක් පුරා නිම කිරීමට සැලසුම් කර තිබූ ව්‍යාපෘති මාස හතක් ඇතුළත අවසන් කළ යුතු බවට චක්‍රලේඛයෙන් දැන් යෝජනා වී ඇති බවත්, අගෝස්තු මාසයේ අපේක්ෂිත ජනාධිපතිවරණ ප්‍රකාශයට පෙර ව්‍යාපෘති සඳහා ආණ්ඩු පක්ෂයට හිමිකම් පෑමට ඉඩ සැලසෙන බවත් හෙට්ටිආරච්චි කියා සිටියි.

‘කඳුකර දශකය’ – 2024-2033 ඒකාබද්ධ ග්‍රාමීය සංවර්ධන වැඩසටහන යන තේමාව යටතේ ජනාධිපති ලේකම් කාර්යාලය විසින් නිකුත් කරන ලද PS/FID/ID/චක්‍රලේඛය/1/2024 දරන තවත් චක්‍රලේඛයක් පිළිබඳවද හෙට්ටිආරච්චි මැතිවරණ කොමිෂන් සභාව වෙත දැනුම් දී තිබේ.

2024 වසරට අදාළ දස අවුරුදු සංවර්ධන සැලැස්මේ කොටසට අදාළ ව්‍යාපෘති යෝජනා මාර්තු 10 වැනිදාට පෙර අනුමැතිය සඳහා ජනාධිපති ලේකම් කාර්යාලයට ඉදිරිපත් කළ යුතු බවත්, එම සියලු සංවර්ධන කටයුතු ජූලි 31 වැනිදාට අවසන් කළ යුතු බවත් එම චක්‍රලේඛයේ සඳහන් කර ඇත.

“මෙම කාලසටහන අනුමැතිය ලබා ගැනීමට, මුදල් වෙන් කිරීමට සහ ව්‍යාපෘති අවසන් කිරීමට මාස හතරක් පමණක් ලබා දෙයි. මෙම දැඩි කාලසටහන අනුව, මෙම ව්‍යාපෘතිවල ගුණාත්මකභාවය සහ සඵලතාව පිළිබඳ ගැටලු ඇති විය හැක,” යනුවෙන් ඔහු අනතුරු ඇඟවයි.

සහල්, ඉඩම්, නිවාස, රැකියා ඉල්ලුම්පත්‍ර බෙදාහැරීම වැනි රජයේ වත්මන් සහනාධාර වැඩසටහන් සඳහා දේශපාලනඥයන් සක්‍රීයව දායක වන ආකාරය ද පැෆ්රල් එම ලිපියෙන් මැතිවරණ කොමිෂන් සභාවේ අවධානය යොමු කර ඇත.

විශේෂයෙන්ම ජනතාව මුහුණ දෙන දුෂ්කරතාවලදී සුබසාධන වැඩසටහන් ක්‍රියාත්මක කිරීමට හෝ රජයේ ප්‍රතිපත්ති මත අයවැය ප්‍රතිපාදන මගින් සංවර්ධන ව්‍යාපෘති ක්‍රියාත්මක කිරීමට තම විරෝධයක් නොමැති නමුත් දේශපාලන පක්ෂ සහ අපේක්ෂකයන් ප්‍රවර්ධනය කිරීමේ මාර්ගයක් ලෙස එවැනි වැඩසටහන් සැලසුම් කිරීමට විරෝධය පළ කරන බවද ඔහු පැවසීය.

ඒ අනුව මෙම කරුණු සම්බන්ධයෙන් අවධානය යොමු කර රාජ්‍ය බලය සහ සම්පත් දේශපාලන පරිහරණය මෙන්ම දේශපාලන පක්ෂ සහ දේශපාලනඥයන් මෙම වැඩසටහන් හරහා ප්‍රවර්ධනය කිරීම වැළැක්වීමට පියවර ගන්නා ලෙසත් හෙට්ටිආරච්චි මැතිවරණ කොමිසමෙන් ඉල්ලා තිබේ.