කුප්‍රකට මත්ද්‍රව්‍ය ජාවාරම්කරුවකු වන ජයසිංහ ආරච්චිගේ හේමන්ත නොහොත් ‘බතල හීන් මහත්තයා’ සතු ගිණුමකින් රුපියල් බිලියන 1.75කට අධික ගනුදෙනු සිදු කර ඇති බව පොලිසිය සොයාගෙන තිබේ.

පොලිස් නීති විරෝධී වත්කම් සහ බුද්ධිමය දේපළ විමර්ශන ඒකකය විසින් සිදු කරන ලද විමර්ශනවලින් හෙළි වී ඇත්තේ මෙම ගනුදෙනු 2021 සහ 2023 අතර වසර 03ක් පුරා සිදු කර ඇති බවයි.

ඔහුගේ බිරිඳගේ නමින් ලියාපදිංචි කර ඇති සහ මීට පෙර බලධාරීන් විසින් අත්අඩංගුවට ගෙන ඇති මොහුගේ දේපළ සම්බන්ධයෙන් සිදු කරන ලද පරීක්ෂණයකදී මෙම මුදල් ගනුදෙනු සොයා ගත් බව පොලිසිය පවසයි.

මේ සම්බන්ධයෙන් ප්‍රකාශයක් සටහන් කර ගැනීම සඳහා අපරාධ පරීක්ෂණ දෙපාර්තමේන්තුව හමුවේ පෙනී සිටීමෙන් පසු ‘බතල හීන් මහත්තයා’ගේ බිරිඳ ඊයේ අත්අඩංගුවට ගෙන ඇත.

ප්‍රශ්න කිරීම්වලදී, මත්ද්‍රව්‍ය ජාවාරම්කරුට ඉන්ධන පිරවුම්හලක් සහ බස් රථ 06ක් හිමි බව ඇය හෙළි කර තිබිණි.

වැල්ලවාය මහේස්ත්‍රාත් අධිකරණයට ඉදිරිපත් කිරීමෙන් පසු දැඩි ඇප කොන්දේසි යටතේ ඇය ඊයේ නිදහස් කරන ලදී.

‘බතල හීන් මහත්තයා’ගේ දේපළ සම්බන්ධයෙන් තවදුරටත් පරීක්ෂණ අඛණ්ඩව සිදුකෙරෙන බව පොලිසිය පැවසීය.

හිටපු ජනාධිපතිවරයකුගේ ආරක්ෂක නිලධාරියකු මත්ද්‍රව්‍ය ජාවාරම්කරුගේ සමීපතම ඥාතියකු බවට තොරතුරු අනාවරණය වී ඇති බව ද ඔවුහු අනාවරණ කළහ.