නව කෘතිම බුද්ධි මාදිලියක් සහ දහස් සංඛ්‍යාත AI බොට් තාක්ෂණය භාවිත කරමින්, දශක ගණනාවක් තිස්සේ විසඳීමට නොහැකිව තිබූ සංකීර්ණ ගණිතමය ගැටලුවකට පැය කිහිපයක් ඇතුළත විසඳුම් සොයාගත් බව OpenAI ආයතනය පවසයි.

ChatGPT නිර්මාණය කළ OpenAI සමාගම ප්‍රකාශ කළේ, ස්වාධීනව කාර්යයන් ඉටුකිරීමේ හැකියාව සහිත AI agents හෙවත් AI බොට්වරුන් 10,000 කගේ පමණ සක්‍රීය දායකත්වයෙන්, මෙම අතිශය අභියෝගාත්මක ගණිත ගැටලුව පැය 88 ක් වැනි කෙටි කාලයක් තුළ විසඳීමට සමත් වූ බවයි.

ද්‍රව සහ වායු ගැලීම පිළිබඳව විස්තර කෙරෙන නේවියර්-ස්ටෝක්ස් සමීකරණ (Navier-Stokes equations) ආශ්‍රිත ගැටලුවක් මෙලෙස විසඳා ඇත.

වසර 90 ක කාලයක සිට මෙම සමීකරණවල වැදගත් අංශ කිහිපයක් සඳහා නිවැරදි ගණිතමය සාධනයක් ඉදිරිපත් කිරීමට කිසිවෙකුටත් හැකි වී නොතිබුණි.

OpenAI සමාගම මෙම ජයග්‍රහණය හඳුන්වා දෙන්නේ ඓතිහාසික සන්ධිස්ථානයක් ලෙස සහ කෘතිම බුද්ධි මෙවලම් කෙතරම් වේගයෙන් දියුණු වන්නේද යන්නට ලැබුණු ප්‍රබල සාක්ෂියක් ලෙසයි.

කෙසේ වෙතත්, OpenAI හි මෙම විසඳුම මෙතෙක් ස්වාධීනව තහවුරු කර නොමැති අතර, සංකීර්ණ ගණිත ගැටලු විසඳීම වෙනුවෙන් විශාල ත්‍යාග මුදල් පිරිනමන ඇමරිකාවේ පිහිටි Clay ගණිත ආයතනය විසින් ද එය තවමත් නිල වශයෙන් පිළිගෙන නොමැත.

සමාගම සඳහන් කළේ අගෝස්තු මස අගදී තමන් නව AI මාදිලියක් පුහුණු කිරීම ආරම්භ කළ බවත්, එමගින් ගණිතමය ගැටලු විසඳීමේ ඉහළ දක්ෂතාවක් ඉතා ඉක්මනින් පෙන්නුම් කළ බවත්ය. AI මාදිලි යනු විශාල දත්ත ප්‍රමාණයක් ඇසුරෙන් තොරතුරු අතර ඇති රටා හඳුනා ගැනීමට සහ අනාගත නිරීක්ෂණ නිගමනය කිරීමට පුහුණු කරන ලද පරිගණක ක්‍රමලේඛ වේ.

මෙම නව AI මාදිලිය, OpenAI සමාගම මෑතකදී නිකුත් කළ මාදිලියට වඩා ඉහළ කාර්යක්ෂමතාවයකින් යුක්ත වන බැවින්, එය තවමත් භාවිත වන්නේ සමාගම අභ්‍යන්තරයේ පමණි. පර්යේෂකයන් තීරණය කළේ මෙම ප්‍රබල මෙවලම ප්‍රමුඛ පෙළේ සංකීර්ණ ගණිත ගැටලු කිහිපයක් විසඳීම සඳහා යොදා ගැනීමටයි.