2026 වසරේ ඔක්තෝබර් සිට දෙසැම්බර් දක්වා කාලය සඳහා විදුලි ගාස්තු ඉහළ නැංවීමක් අවශ්‍ය නොවන බව ජාතික පද්ධති මෙහෙයුම්කරු සමාගම (National System Operator – NSO) ප්‍රකාශ කර තිබේ.

2026 වසරේ හතරවන කාර්තුව සඳහා යෝජිත විදුලි ගාස්තු සංශෝධනය සම්බන්ධයෙන් අද (05) පැවැති පාර්ශවකරුවන්ගේ උපදේශන හමුවකදී NSO ආයතනය මෙම දැනුම්දීම සිදුකළේය.

NSO ආයතනයට අනුව, ජලාශවල දැනට පවතින ජල ධාරිතාව සහ එල් නිනෝ කාලගුණික තත්ත්වය යටතේ ලැබෙන සාමාන්‍යයට වඩා වැඩි වර්ෂාපතන අනාවැකි පදනම් කරගනිමින් මෙම තීරණය ගෙන ඇත.

හතරවැනි කාර්තුව සඳහා විදුලි ගාස්තු 2.88% කින් සංශෝධනය කරන ලෙස NSO ආයතනය මුලින් ඉල්ලා සිටි බව ශ්‍රී ලංකා මහජන උපයෝගිතා කොමිෂන් සභාව ඊයේ (04) අනාවරණය කිරීමෙන් පසුව මෙම නිවේදනය නිකුත් විය.

කෙසේවෙතත්, පවතින තත්ත්වයන් සැලකිල්ලට ගනිමින් ලබාදිය හැක්කේ 1.46% ක ගාස්තු සංශෝධනයක් පමණක් බව මහජන උපයෝගිතා කොමිෂන් සභාව සඳහන් කළේය.

යෝජිත විදුලි ගාස්තු සංශෝධනය පිළිබඳ අදහස් ලබාගැනීම සඳහා මහජන උපයෝගිතා කොමිෂන් සභාව අද දින මහජන උපදේශන පවත්වයි.

මෙම උපදේශන ක්‍රියාවලියෙන් පසුව ඔක්තෝබර් සිට දෙසැම්බර් දක්වා කාලය සඳහා වන විදුලි ගාස්තු පිළිබඳ අවසන් තීරණය ප්‍රකාශයට පත්කිරීමට නියමිතය.

NSO ආයතනය විසින් 2026 හතරවන කාර්තුව සඳහා වන විදුලි ගාස්තු සමාලෝචන යෝජනාව මීට පෙර පරීක්ෂාව සඳහා මහජන උපයෝගිතා කොමිෂන් සභාව වෙත යොමුකර තිබිණි.