August 12, 2025
නියෝජ්ය ආරක්ෂක අමාත්ය මේජර් ජෙනරාල් (විශ්රාමික) අරුණ ජයසේකරට එරෙහිව විපක්ෂයේ පක්ෂ විසින් කථානායකවරයාට විශ්වාසභංග යෝජනාවක් භාරදී ඇත.
ඊයේ යෝජනාව භාරදීමට නියමිතව තිබුණද, කථානායකවරයා පොළොන්නරුවේ සිටි බැවින් එය අදට කල්තබන ලදී.
2019 පාස්කු ඉරිදා ත්රස්ත ප්රහාර පිළිබඳ විමර්ශනවලට ඔහුගේ සම්බන්ධයක් ඇති බව පවසමින්, ආරක්ෂක නියෝජ්ය අමාත්ය අරුණ ජයසේකරට එරෙහිව විශ්වාසභංග යෝජනාව පාර්ලිමේන්තුවට ඉදිරිපත් කිරීමට විපක්ෂය තීරණය කළේය.
බෝම්බ ප්රහාරවලට පෙර තීරණාත්මක අවස්ථා ලෙස සැලකෙන වවුනතිව් පොලිස් ඝාතන සහ සයින්දමරුතු පිපිරීම ඇතුළු පාස්කු ප්රහාරයන්ට සම්බන්ධ ප්රධාන සිදුවීම්වලදී ආරක්ෂක හමුදාවේ (නැගෙනහිර) අණදෙන නිලධාරියා ලෙස ජයසේකරගේ භූමිකාව පිළිබඳව මෙම යෝජනාවේ සඳහන් කර ඇත.
ආරක්ෂක අමාත්යාංශයේ බලවත් තනතුරක් දරන අරුණ ජයසේකර, දැනට සිදුවෙමින් පවතින පරීක්ෂණවලට සම්බන්ධ යටත් නිලධාරීන්ට හෝ සාක්ෂිකරුවන්ට අපක්ෂපාතීත්වය අවදානමට ලක්කරමින් බලපෑම් කළ හැකි බැවින්, අන්තර් සම්බන්ධතා පිළිබඳ ගැටුමක් පවතින බව එහි තවදුරටත් සඳහන් වේ.
අරුණ ජයසේකර ධුරයේ රැඳීසිටින තාක්කල් විමර්ශන ක්රියාවලිය කෙරෙහි මහජන සහ ආයතනික විශ්වාසය නැවත ඇති කළ නොහැකි බව තර්ක කරමින්, අරුණ ජයසේකර ඔහුගේ අමාත්ය ධුරයෙන් ඉවත්කරන ලෙස මෙම යෝජනාව පාර්ලිමේන්තුවෙන් ඉල්ලා සිටී.
විශ්රාමික මේජර් ජෙනරාල්වරයෙකු වන අරුණ ජයසේකර 2024 නොවැම්බර් මාසයේදී ජාතික ලැයිස්තුව හරහා පාර්ලිමේන්තුවට පත්කරන ලද අතර පසුව ආරක්ෂක නියෝජ්ය අමාත්යවරයා ලෙස නම්කරන ලදී.
