ලබන සැප්තැම්බර් 15 වනදා සිට ක්‍රියාත්මක වන පරිදි සිය දේශසීමා ආගමන-විගමන සහ වීසා රෙගුලාසි වඩාත් තද කිරීමට චීන රජය තීරණය කර ඇත. නව නීති මගින් බලධාරීන්ට සංචාරකයින්ගේ අරමුණු සහ දත්ත පරීක්ෂා කිරීමට වැඩි බලතල ලැබෙනු ඇත.

ඇතුළුවීම, පිටවීම හෝ රැඳී සිටීම සඳහා ඉල්ලුම් කිරීමේදී නියමිත අරමුණ නිවැරදිව සඳහන් කළ යුතු අතර, ඒ සඳහා අදාළ ලේඛන හෝ විද්‍යුත් දත්ත පරීක්ෂා කිරීමට බලධාරීන්ට හැකියාව පවතී.

ව්‍යාජ ලේඛන හෝ අසත්‍ය ප්‍රකාශ ඉදිරිපත් කරන විදේශිකයන්ට වසර 1 සිට 5 දක්වා කාලයකට චීනයට ඇතුළුවීම තහනම් කෙරේ.

අසත්‍ය ආරාධනා පත්‍ර සපයන පුද්ගලයින්ට යුවාන් 10,000 දක්වාද (ඇමරිකානු ඩොලර් 1,483), ආයතන සඳහා යුවාන් 50,000 දක්වාද දඩ නියම කළ හැක.

ජංගම දුරකථන අහඹු ලෙස පරීක්ෂා කිරීමට බලධාරීන්ට අවසර නැති අතර, විද්‍යුත් දත්ත භාවිත කරන්නේ අනන්‍යතාවය තහවුරු කරගැනීමට පමණි.

රටවල් 50ක් සඳහා ලබාදී ඇති දින 30ක නොමිලේ වීසා පහසුකම වෙනස් නොවී ඉදිරියටත් ක්‍රියාත්මක වේ.