ළමා ලිංගික අපයෝජන සම්බන්ධයෙන් වරදකරුවන් වූ පුද්ගලයන්ගේ නම් ඇතුළත් ලැයිස්තුවක් සැකසීමට අදහස් කරන බව ජාතික ළමා ආරක්ෂක අධිකාරිය නිවේදනය කරයි.

සිරදඬුවම් විඳීමෙන් පසු මෙම වැරදිකරුවන් නැවත නැවතත් එම වැරදි සිදුකිරීමට වැඩි ඉඩක් පවතින බවත්, මෙමගින් ළමුන් අපචාරකයන්ට ගොදුරු වීමේ අවදානමක් පවතින බවත් ජාතික ළමා ආරක්ෂක අධිකාරියේ සභාපති චානක උදයකුමාර අමරසිංහ ප්‍රකාශ කරයි.

ළමා අපයෝජනයට ලක්වූවන්ගේ තොරතුරු අදාළ පාර්ශ්ව වෙත ලබාදීම සඳහා ඔවුන්ගේ ලැයිස්තුවක් සකස් කිරීමට අධිකාරිය විසින් කටයුතු කරමින් සිටින බව ද හෙතෙම ප්‍රකාශ කළේය.

මීට අමතරව, බන්ධනාගාරයෙන් නිදහස් වූ පසු, ළමුන් නිතර ගැවසෙන පරිශ්‍රවලට වැරදිකරුවන් ඇතුළුවීම වැළැක්වීමට හෝ සීමාකිරීමට නීතිමය ප්‍රතිපාදන හඳුන්වා දිය හැකිද යන්න සාකච්ඡා කරන බවද අධිකාරිය සඳහන් කරයි.

සභාපතිවරයාට අනුව 2023 දී ළමා ලිංගික අපයෝජන සිද්ධීන් සංඛ්‍යාවේ වර්ධනයක් සිදුවී ඇත.

2022 වසරේ වාර්තා වූ සිදුවීම් 1,618ට සාපේක්ෂව පසුගිය වසරේ ශ්‍රී ලංකාව ගැහැණු ළමුන් දූෂණය කිරීම් 1,639 ක් වාර්තා වී තිබේ.