දකුණු වෙරළට ඔබ්බෙන් වූ මුහුදේ පාවෙමින් තිබියදී ශ්‍රී ලංකා නාවික හමුදාව විසින් සොයා ගත් පාර්සල් 51 ඊයේ සවස තංගල්ල ධීවර වරායට ගෙන එන ලදී.

එම පාර්සල්වල තිබූ ද්‍රව්‍ය නාවික හමුදාව විසින් මේ වනවිට අනාවරණ කර ගෙන තිබේ.

ඒ අනුව අයිස් මත්ද්‍රව්‍ය කිලෝග්‍රෑම් 670ක්, හෙරොයින් කිලෝග්‍රෑම් 156ක් සහ හෂිස් කිලෝග්‍රෑම් 12ක් එම පාර්සල්වල අඩංගු බව ශ්‍රී ලංකා නාවික හමුදා ප්‍රකාශකවරයා පැවසීය.

මත්ද්‍රව්‍ය අඩංගු බවට සැක කෙරෙන පාවෙන පාර්සල් 50කට අධික ප්‍රමාණයක් දකුණු වෙරළට ඔබ්බෙන් මුහුදේ පාවෙමින් තිබියදී ශ්‍රී ලංකා නාවික හමුදාව විසින් තංගල්ල ධීවර වරායට ඊයේ (14) ගෙන එන ලදී.

මෙම මත්ද්‍රව්‍ය තොගය ‘උණාකුරුවේ ශාන්ත’ ලෙස හඳුන්වන කුප්‍රකට මත්ද්‍රව්‍ය ජාවාරම්කරුට අයත් බවට සැක කෙරෙන බව වාර්තා වේ.

යාත්‍රා තුනක් භාවිතා කරමින් මත්ද්‍රව්‍ය තොගයක් රට තුළට ජාවාරම් කිරීමට උත්සාහ කිරීම සම්බන්ධයෙන් පොලිස් මත්ද්‍රව්‍ය නාශක කාර්යාංශයේ අධ්‍යක්ෂ ජ්‍යෙෂ්ඨ පොලිස් අධිකාරී හේමාල් ප්‍රශාන්තට සැප්තැම්බර් මස මුලදී තොරතුරු ලැබී තිබිණි.

ඒ අනුව, නාවික හමුදාව සහ පොලිස් මත්ද්‍රව්‍ය නාශක කාර්යාංශය, පොලිස්පතිවරයාගේ සෘජු අධීක්ෂණය යටතේ, දෙවුන්දර සහ තංගල්ල මුහුදු ප්‍රදේශවල දින 32ක් සෝදිසි මෙහෙයුම් සිදු කර තිබිණි.

මෙහෙයුම් අතරතුර, බලධාරීන් අදාළ යාත්‍රාවල කාර්ය මණ්ඩලය සම්බන්ධ කර ගෙන තිබූ අතර ඔවුන් කිසිදු නිශ්චිත තොරතුරක් ලබා දී නොතිබිණි.

යාත්‍රාවල සවි කර තිබූ යාත්‍රා නිරීක්ෂණ පද්ධතිය (VMS) ඒවායේ ස්ථාන සැඟවීම සඳහා අක්‍රිය කර ඇති බව ද අනාවරණ විය.

ශ්‍රී ලංකා ගුවන් හමුදාව ද මෙහෙයුමට සහභාගී වුවද, යාත්‍රා තුන සිටින ස්ථානය පිළිබඳ කිසිදු තොරතුරක් ලබා ගැනීමට නොහැකි විය.