විදේශ රැකියා සඳහා යවන බව පවසා පුද්ගලයින්ගෙන් මුදල් වංචා කිරීමේ සිද්ධීන් සම්බන්ධයෙන් වරෙන්තු 12 ක් නිකුත් කර තිබූ 40 හැවිරිදි කාන්තාවක් රාගම ප්‍රදේශයේදී අත්අඩංගුවට ගෙන තිබේ.

පොලිස් මාධ්‍ය කොට්ඨාසය සඳහන් කළේ, ලද තොරතුරකට අනුව රාගම පොලිසිය විසින් ඊයේ රාත්‍රියේ ගින්කෙන්ද ප්‍රදේශයේදී සිදුකළ වැටලීමකදී මෙම සැකකාරිය අත්අඩංගුවට ගත් බවයි.

රාගම ප්‍රදේශයේම පදිංචිකාරියක වන මෙම සැකකාරිය, විදේශගත වීමේ අවස්ථා ලබා දෙන බව පවසමින් විවිධ පුද්ගලයින්ගෙන් මුදල් ලබාගෙන ඇති බවට චෝදනා එල්ල වී ඇත.

ඇය අධිකරණය මගහැර සිටීම හේතුවෙන් වැලිසර මහේස්ත්‍රාත් අධිකරණය මගින් ඇයට එරෙහිව වරෙන්තු 12 ක් නිකුත් කර තිබූ බව විමර්ශනවලදී අනාවරණය වී තිබේ.

අත්අඩංගුවට ගත් සැකකාරිය අද වැලිසර මහේස්ත්‍රාත් අධිකරණය හමුවට ඉදිරිපත් කිරීමට නියමිතව තිබුණි.

රාගම පොලිසිය සිද්ධිය සම්බන්ධයෙන් වැඩිදුර විමර්ශන පවත්වයි.