රණවිරුවන් හා සම්බන්ධ සංවේදී කරුණුවලදී ප්‍රවේශම් සහගතව සහ සාධාරණව කටයුතු කිරීමේ අවශ්‍යතාව පූජ්‍ය දිඹුල්කුඹුරේ විමලධම්ම හිමි අවධාරණය කළහ.

තමන්වහන්සේ බැහැදැකීමට පැමිණි ශ්‍රී ලංකා පොදුජන පෙරමුණේ ජාතික සංවිධායක නාමල් රාජපක්ෂගේ නායකත්වයෙන් යුත් දූත පිරිසට උන්වහන්සේ මේ බව සඳහන් කළහ.

කවුරුන් හරිද කවුරුන් වැරදිද යන්න නොදන්නා බැවින් ඒ පිළිබඳ කතා කිරීමේ දී සැළකිලිමත් වියයුතු බව උන්වහන්සේ ප්‍රකාශ කළහ.

නාමල් රාජපක්ෂ ඇතුළු කණ්ඩායමක් සියම් නිකායේ අස්ගිරි පාර්ශවයේ මහානායක හිමිවරුන් සහ අනුනායක හිමිවරුන් මෙන්ම මල්වතු පාර්ශවයේ මහානායක හිමිවරුන් සහ අනුනායක හිමිවරුන් ද බැහැදැකීමට ගියහ.

රණවිරුවන් මුහුණ දෙන අඛණ්ඩ දුෂ්කරතා පිළිබඳ කණ්ඩායම එහිදී කණස්සල්ල පළ කළහ.

රට වෙනුවෙන් ජීවිත පූජා කළ අය වෙනුවෙන් පෙනී සිටීම ඓතිහාසික වගකීමක් බව ශ්‍රී ලංකා පොදුජන පෙරමුණ මහානායක හිමිවරුන් වෙත භාර දුන් ලිපියක අවධාරණය කළේය.

ශ්‍රී ලංකා පොදුජන පෙරමුණේ දූත පිරිස අස්ගිරි පාර්ශවයට ගිය අතර එහිදී අතිපූජ්‍ය වරකාගොඩ ශ්‍රී ඥානරතන මහානායක හිමිපාණන් වහන්සේ, අනුනායක හිමිපාණන් වහන්සේ, පූජ්‍ය වෙඬරුවේ උපාලි හිමිපාණන් වහන්සේ සහ අලුතින් පත් කරන ලද අනුනායක හිමිපාණන් වහන්සේ වන නාරම්පනාවේ ආනන්ද හිමිපාණන් වහන්සේ බැහැදුටුවේය.

දශකයකට පෙර සිදු වූ සිදුවීම් මත පදනම්ව හමුදා නිලධාරීන්ට, විශේෂයෙන් හිටපු නාවික හමුදාපතිවරයාට එරෙහිව නීතිමය ක්‍රියාමාර්ග ගැනීම පිළිබඳ නාමල් රාජපක්ෂ එහිදී කණස්සල්ල පළ කළේය.

මෙම ක්‍රියාමාර්ග ඩයස්පෝරා පීඩනයේ බලපෑමට ලක්ව ඇති බව ඔහු ප්‍රකාශ කළ අතර, එවැනි පියවරයන් ශ්‍රී ලංකාවේ සන්නද්ධ හමුදාවන්ගේ චිත්ත ධෛර්යයට දිගුකාලීන ප්‍රතිවිපාක ඇති කළ හැකි බවට අනතුරු ඇඟවීය.

මෙම ගැටලුවලට ප්‍රතිචාර දක්වමින් පූජ්‍ය වෙඬරුවේ උපාලි හිමිපාණන් වහන්සේ ප්‍රකාශ කර ඇත්තේ සංවේදී කරුණු ගැන සංයමයෙන් කටයුතු කළ යුතු බවයි.