හමුදා සෙබළුන් විසින් පුද්ගලයෙකු ඝාතනය කළ බවට චෝදනා එල්ල කරමින් ලබන සඳුදා (18) උතුරු සහ නැගෙනහිර පළාත්වල පැවැත්වීමට නියමිත ඉලංකෙයි තමිල් අරසු පකෂයේ (ITAK) හර්තාලයට ශ්‍රී ලංකා මුස්ලිම් කොංග්‍රසය (SLMC) සහාය පළ කර තිබේ.

32 හැවිරිදි එදිර්මානසිංහම් කබිල්රාජ් සහ තවත් සිව්දෙනෙකු හමුදා කඳවුරට කැඳවා දරුණු ලෙස පහර දුන් බවට වාර්තා වීමෙන් දින දෙකකට පසු, අගෝස්තු 09 වැනිදා මුත්තයියන්කට්ටු වැවෙන් ඔහුගේ මළ සිරුර සොයා ගෙන තිබිණි.

“ශ්‍රී ලංකා හමුදා සාමාජිකයන් විසින් සිදු කරන ලද බවට වාර්තා වන මුලතිව්හි මෑතකදී සිදු වූ ඝාතනය ගැන අපි කෝපයට පත්වෙමු. මෙම කුරිරු ක්‍රියාව මහජනතාව ආරක්ෂා කිරීමේ කාර්යය භාරව සිටින හමුදාවන් තුළම නීතිය හා සාමය පිළිබඳ ගැඹුරු අර්බුදය තවත් මතක් කර දෙයි.” යනුවෙන් හර්තාලයට සහාය පළ කරමින් ශ්‍රී ලංකා මුස්ලිම් කොංග්‍රසය නිකුත් කළ නිවේදනයේ දැක්වේ.

මෙවැනි බරපතළ අපරාධ සඳහා තම සන්නද්ධ හමුදා වගකිව යුතු බවට රජයට ඇති නොහැකියාව හෝ අකමැත්ත මහජන විශ්වාසය ඛාදනය කර අහිංසක සිවිල් වැසියන්ගේ ජීවිත අනතුරේ හෙළා ඇති බව ශ්‍රී ලංකා මුස්ලිම් කොංග්‍රසය තවදුරටත් පැවසීය.

ඊශ්‍රායලයේ සංචාරකයන්ට වීසා රහිතව ඇතුළුවීම ලබා දීමේදී රජයේ ආකල්පය ද ඒ හා සමානව කණස්සල්ලට කරුණක් බව ශ්‍රී ලංකා මුස්ලිම් කොංග්‍රසය පෙන්වා දුන්නේය.

ඔවුන්ගෙන් බොහෝ දෙනෙක් ගාසා තීරයේ අන්තර්ජාතික මානුෂීය නීතිය උල්ලංඝනය කිරීම සම්බන්ධයෙන් පුළුල් ලෙස විවේචනයට ලක්වන ඊශ්‍රායල ආරක්ෂක හමුදා (IDF) සාමාජිකයන් බව කියැවේ.

මෙරට පුරවැසියන් සන්නද්ධ හමුදා අතින් ප්‍රචණ්ඩත්වයට සහ අයුක්තියට මුහුණ දෙන අවස්ථාවක එවැනි ප්‍රතිපත්ති වැරදි සංඥාවක් යවන බව එම පක්ෂය පැවසීය.

“යුක්තිය, වගවීම සහ හමුදාව තුළ දඬුවම් නොලැබීම වහාම අවසන් කරන ලෙස ඉල්ලා සිටින සාමකාමී විරෝධතාවක් ලෙස ඉලංකෙයි තමිල් අරසු කච්චි (ITAK) විසින් 18 වැනි සඳුදා ප්‍රකාශයට පත් කරන ලද හර්තාලය සමඟ අපි පූර්ණ සහයෝගයෙන් සිටිමු. උතුරු නැගෙනහිර පුරා සිටින අපගේ මුස්ලිම් සහෝදර සහෝදරියන්ගෙන් අවම වශයෙන් 18 වැනි සඳුදා උදෑසන කාලයේ දී ඔවුන්ගේ වෙළඳසැල් සහ ව්‍යාපාර වසා දමා මෙම සාමූහික ස්ථාවරයට එක්වන ලෙස අපි ඉල්ලා සිටිමු,” යැයි ශ්‍රී ලංකා මුස්ලිම් කොංග්‍රසය පැවසීය.

මෙම එක්සත් ක්‍රියාමාර්ගය මගින් දෙමළ සහ මුස්ලිම් යන සියලු ප්‍රජාවන් ප්‍රචණ්ඩත්වය ප්‍රතික්ෂේප කරන බවත්, අයුක්තියට විරුද්ධ වන බවත්, රජය බලය අයුතු ලෙස භාවිත කිරීමට ඉඩ දෙන විට හෝ නිදහසට කරුණු ඉදිරිපත් කරන විට නිහඬව නොසිටිය යුතු බවටත් පැහැදිලි සහ බලගතු පණිවිඩයක් යවනු ඇති බව පක්ෂය තවදුරටත් සඳහන් කළේය.

“මුලතිව් ඝාතනය සහ සියලු පුරවැසියන්ගේ ආරක්ෂාව සඳහා නීතියට ඉහළින් කිසිවකු නොමැති ශ්‍රී ලංකාවක් සඳහා සහයෝගීතාවයෙන් අපි එක්ව නැගී සිටිමු,” යනුවෙන් එහි වැඩිදුරටත් සඳහන් විය.