සෞඛ්‍ය සම්බන්ධීකරණය ශක්තිමත් කිරීමේ පියවරක් ලෙස රජය විසින් දිස්ත්‍රික් සෞඛ්‍ය සම්බන්ධීකරණ නිලධාරීන් ලෙස පාර්ලිමේන්තු මන්ත්‍රීවරුන් පත් කර ඇති බව සෞඛ්‍ය අමාත්‍යාංශය පවසයි.

රටේ සියලුම දිස්ත්‍රික්ක ආවරණය වන පරිදි ‘දිස්ත්‍රික් සෞඛ්‍ය සම්බන්ධීකරණ නිලධාරීන්’ ලෙස පාර්ලිමේන්තු මන්ත්‍රීවරුන් කණ්ඩායමක් පත් කිරීම සඳහා සෞඛ්‍ය අමාත්‍ය නලින්ද ජයතිස්ස විසින් ඉදිරිපත් කරන ලද කැබිනට් පත්‍රිකාවකට අනුව මෙම පත්වීම් සිදු කර ඇත.

පත් කරන ලද දිස්ත්‍රික් සම්බන්ධීකරණ නිලධාරීන්ට පවරා ඇති කාර්යභාරයන් සහ වගකීම් අතරට දිස්ත්‍රික් මට්ටමින් සෞඛ්‍ය අවශ්‍යතා හඳුනා ගැනීම, එම අවශ්‍යතා ජාතික හා පළාත් සෞඛ්‍ය සැලසුම්වලට ඒකාබද්ධ කිරීමට පහසුකම් සැලසීම, රේඛීය අමාත්‍යාංශය සහ පළාත් සෞඛ්‍ය ආයතන අතර සම්බන්ධීකරණය සහ සම්පත් කාර්යක්ෂමව භාවිත කිරීම ශක්තිමත් කිරීම, අමාත්‍යාංශ ප්‍රතිපත්තිවලට අනුකූලව ප්‍රාදේශීය සංවර්ධන සැලසුම් ක්‍රියාත්මක කිරීම සම්බන්ධීකරණය කිරීම, ප්‍රමුඛතා ව්‍යාපෘති හඳුනාගෙන ඒවා අමාත්‍යාංශයට නිර්දේශ කිරීම සහ ක්‍රියාත්මක වන ව්‍යාපෘතිවල ප්‍රගතිය නිරීක්ෂණය කිරීම සහ නියමිත කාල රාමුව තුළ ඒවා සාර්ථකව නිම කිරීමට සහාය වීම ඇතුළත් වේ.

ඒ අනුව ඒ ඒ දිස්ත්‍රික්ක සඳහා දිස්ත්‍රික් සම්බන්ධීකරණ නිලධාරීන් ලෙස අමාත්‍ය මණ්ඩල පත්‍රිකාව මගින් නම් කර ඇති මන්ත්‍රීවරුන් මෙසේයි.

අනුරාධපුර: සුසන්ත කුමාර නවරත්න
බදුල්ල: රවීන්ද්‍ර බණ්ඩාර
මඩකලපුව: කන්දසාමි ප්‍රභූ
කොළඹ: නජිත් ඉන්දික
දිගාමඩුල්ල/අම්පාර: එම්.එම්. සුගත් රත්නායක
ගාල්ල: නිශාන්ත සමරවීර
ගම්පහ: ධර්මප්‍රිය විජේසිංහ
හම්බන්තොට: සඳරුවන් මදාරසිංහ
යාපනය: එස්.ශ්‍රීභවානන්දරාජා
කෑගල්ල: ආර්.එම්. සමන්ත රණසිංහ
කළුතර: වෛද්‍ය නිහාල් අබේසිංහ
මහනුවර: තනුර දිසානායක
කුරුණෑගල: ජගත් ගුණවර්ධන
මාතලේ: දීප්ති නිරංජනී වාසලගේ මෙනවිය
මාතර: ලාල් ප්‍රේමනාත්
මොනරාගල: එච්.එම්. සරත් කුමාර
නුවරඑළිය: ටී.මංජුල සුරවීරආරච්චි
පොළොන්නරුව: පද්මසිරි බණ්ඩාර
පුත්තලම: ගයාන් ජානක
රත්නපුර: ජනක සේනාරත්න
ත්‍රිකුණාමලය: රොෂාන් අක්මීමන
වන්නි: සෙල්වතම්බි තිලකනාදන්