පසුගිය වසරේ බලපත්‍ර අලුත් කිරීමට අපොහොසත් වූ ගිනි අවි හිමිකරුවන් 7,000කට අධික සංඛ්‍යාවකට එරෙහිව ආරක්ෂක අමාත්‍යාංශය නීතිමය පියවර ගැනීමට නියමිතය.

ආරක්ෂක අමාත්‍යාංශයේ 2024 විගණන වාර්තාවට අනුව, 2024 දෙසැම්බර් 31 වැනි දින වනවිට ගිනි අවි බලපත්‍ර 7,125ක් අලුත් කර නොමැති බව අනාවරණය විය.

ගිනි අවි ආඥා පනතේ 182 අධිකාරියේ 29 (1) වගන්තිය යටතේ, බලපත්‍රය කල්ඉකුත් වී දින දහයක් ඇතුළත ගිනි අවි හිමිකරුවන් තම ගිනි අවි සහ බලපත්‍රය බලපත්‍ර නිලධාරියාට ඉදිරිපත් කළ යුතුය.

බලපත්‍ර නිලධාරියා විසින් නම්කරන ලද ස්ථානයක ගිනි අවි ගබඩා කළ යුතුය.

කෙසේවෙතත්, අලුත් නොකළ බලපත්‍ර සඳහා මෙම ක්‍රියා පටිපාටි අනුගමනය කර නොමැති බව විගණනයේදී සොයාගෙන තිබේ.

ආරක්ෂක අමාත්‍යාංශය පවසන්නේ, බලපත්‍ර අලුත් කිරීමට අපොහොසත් වූ ගිනි අවි හිමිකරුවන් පිළිබඳ වාර්තාවක් පොලිස්පතිවරයා විසින් ඉදිරිපත් කර ඇති බවත්, නීතිමය පියවර ගන්නා ලෙස දිස්ත්‍රික් ලේකම්වරුන්ට උපදෙස් දී ඇති බවත්ය.

ගිනි අවි දත්ත කළමනාකරණය කිරීම සඳහා තොරතුරු පද්ධතියක් ප්‍රමුඛතාවයක් ලෙස හඳුනාගෙන ඇති බවත්, මූලික ක්‍රියාත්මක කිරීමේ කටයුතු දැනටමත් සිදුවෙමින් පවතින බවත් අමාත්‍යාංශය වැඩිදුරටත් පවසයි.

අලුත් නොකළ සියලුම ගිනි අවි බලපත්‍ර සම්බන්ධයෙන් ගිනි අවි ආඥාපනතේ 29 (1) වගන්තියට අනුව පියවර ගතයුතු බවට විගණනය නිර්දේශ කර ඇත.

මේ අතර, ගිනි අවි ආඥාපනත නීතිය යටතේ කෘෂිකාර්මික සහ කෘෂිකාර්මික නොවන අරමුණු සඳහා නිකුත් කරන ලද ගිනි අවි බලපත්‍රවල වාර්තාවල සැලකිය යුතු විෂමතාවක්ද විගණන වාර්තාවෙන් අනාවරණය කර ඇත.

විගණන නිරීක්ෂණයට අනුව, ගිනි අවි ආඥාපනතේ 182 වන පරිච්ඡේදයේ 27 වැනි වගන්තිය යටතේ, බලපත්‍ර නිලධාරීන් නියමිත ආකෘතියට අනුව සියලුම තුවක්කු බලපත්‍රවල ලේඛනයක් පවත්වාගෙන යෑම අවශ්‍ය වේ. පවතින වාර්තා මත පදනම්ව, 1995 සිට 2024 දෙසැම්බර් 31 දක්වා බෝග සහ දේපළ ආරක්ෂාව සඳහා ගිනි අවි බලපත්‍ර 25,064 ක් නිකුත්කර ඇත.

කෙසේවෙතත්, 2024 දෙසැම්බර් 31 වන දිනට දිස්ත්‍රික් ලේකම් කාර්යාලය විසින් විගණකවරුන් වෙත ඉදිරිපත් කරන ලද ගිනි අවි බලපත්‍ර සංඛ්‍යාව පෙන්වන ලේඛනයේ බලපත්‍ර 12,981 ක වෙනසක් පෙන්නුම් කර ඇති අතර එමඟින් වාර්තාවල නොගැලපීම් ඉස්මතු කර ඇත.

මෙම විගණන සොයාගැනීම්වලට ප්‍රතිචාර දක්වමින් ප්‍රධාන ගිණුම්කරණ නිලධාරියා දැනුම්දී ඇත්තේ, කෘෂිකාර්මික සහ කෘෂිකාර්මික නොවන අරමුණු සඳහා නිකුත් කරන ලද ගිනි අවි බලපත්‍ර පිළිබඳ සවිස්තරාත්මක සහ නිවැරදි දත්ත දිස්ත්‍රික් ලේකම් කාර්යාල හරහා ලබාගැනීමට පියවර ගෙන ඇති බවයි.

(Daily Mirror)