විදේශීය රජයන්ගෙන් ඖෂධ සෘජුවම මිලදී ගැනීම සඳහා පහසුකම් සැලසීම වෙනුවෙන් සෞඛ්‍ය අමාත්‍යාංශය කමිටුවක් පත්කිරීමට නියමිතය.

ඖෂධ කර්මාන්තය විසින් මීට විරුද්ධව අදහස් පළකර තිබුණ ද මෙම පියවරට කැබිනට් මණ්ඩලය විසින් අනුමැතිය ලබා දෙන ලදී.

‘ඖෂධ සැපයුම් දාමය තුළ පවතින ගැටලු විසඳා බාධා අවම කරන තුරු’ එවැනි රජයන්ගෙන් සෘජු සහාය ලබා ගැනීමට අමාත්‍යාංශය සැලසුම් කර න බව සෞඛ්‍ය අමාත්‍යාංශයේ ප්‍රකාශයක දැක්විණි.

රජයෙන් රජයට (G2G) පදනම මත ඖෂධ මිලදී ගැනීමේ හැකියාව ගවේෂණය කිරීම සඳහා විදේශ රටවල ශ්‍රී ලංකාවේ දූත මණ්ඩල හරහා විදේශ රජයන් වෙත මෑතකදී ලිපි යවා ඇති බව වාර්තා වේ.

එම රටවල් වන්නේ ඉන්දියාව, පකිස්ථානය, චීනය, ඉන්දුනීසියාව, තුර්කිය සහ බංග්ලාදේශයයි.

ඖෂධ 111ක ලැයිස්තුවක් ද ඊට ඇතුළත් බව දැනගන්නට තිබේ.

සෞඛ්‍ය අමාත්‍යාංශයේ ලේකම් වෛද්‍ය අනිල් ජාසිංහ පැවසුවේ ජාතික ඖෂධ නියාමන අධිකාරියෙන් පූර්ව ලියාපදිංචියක් නොමැති ඖෂධ සම්බන්ධයෙන්, ලියාපදිංචිය අත්හැරීම් (WoRs) නිකුත් කරන බවයි.

රජයෙන් රජයට ඖෂධ ලබා ගැනීම සාමාන්‍ය ක්‍රමයක් නොවන බවත් අපට එම විකල්පය තිබිය යුතු බවත් ඔහු පැවසීය.

සියලුම ප්‍රධාන ඖෂධ වෘත්තීය සමිති මෙම පියවරට විරුද්ධ වී ඇත.

මැයි මාසයේ මුලදී සෞඛ්‍ය අමාත්‍යවරයා වෙත යවන ලද ලිපියක, ශ්‍රී ලංකා ඖෂධ කර්මාන්ත මණ්ඩලය (SLCPI), ශ්‍රී ලංකා ජාතික ඖෂධ නිෂ්පාදකයන්ගේ මණ්ඩලය සහ ශ්‍රී ලංකා ඖෂධ නිෂ්පාදකයන්ගේ සංගමය අනතුරු ඇඟවූයේ එය බරපතළ හා දුරදිග යන ප්‍රතිවිපාක ඇති කළ හැකි බවටයි.

ප්‍රමිතියෙන් තොර හෝ නියාමනය නොකළ ඖෂධ ගලා ඒම හේතුවෙන් රෝගීන්ගේ ආරක්ෂාවට අවදානමක් ඇති බව ද ඔවුන් සඳහන් කර තිබේ.

එසේම දශක ගණනාවක් පැරණි දේශීය ඖෂධ නිෂ්පාදන කර්මාන්තය බිඳ වැටීමේ අවදානමක් ඇති බවත් රැකියා දහස් ගණනක් සහිත ජීවනෝපායන් අහිමි වීම සහ ආනයන මත යැපීම සහ විදේශ විනිමය පිටතට ගලායෑම වැඩි වීම ඇතුළු දේශීය ආර්ථිකයට අහිතකර බලපෑමක් ඇතිවිය හැකි බවත් ඔවුන් සඳහන් කර ඇත.

කෙසේවෙතත්, රජයේ නිලධාරීන් පවසන්නේ ඖෂධ කර්මාන්තය මිල ගණන් වෙනස් කරන සහ ටෙන්ඩර් ක්‍රියාවලිය හසුරුවන කණ්ඩායම් පිහිටුවාගෙන සිටින බවයි.

මෙය ඇතැම් ඖෂධ සැපයීමේදී ඒකාධිකාරයන් නිර්මාණය වීමට හේතු වී තිබේ.

“අවසාන ප්‍රතිඵලය වන්නේ ඖෂධ හිඟයයි,” යනුවෙන් සෞඛ්‍ය අමාත්‍යාංශයේ ජ්‍යෙෂ්ඨ පරිපාලකයෙක් පැවසීය.

The Sunday Times