අතුරුගිරියේ වෙඩිතැබීමේ සිද්ධියට සම්බන්ධ පාතාල නායක කංජිපානි ඉම්රාන් පළායෑම සම්බන්ධයෙන් මත පළවෙමින් පවතින අතර, ඔහු ඇප මත නිදහස් වූ වහාම රටින් පිටවීම සඳහා කංජිපානි වෙනුවෙන් පෙනීසිටි නීතිඥවරුන් ප්‍රධාන කාර්යභාරයක් ඉටුකළ බව මහජන ආරක්ෂක ඇමැති ටිරාන් අලස් ප්‍රකාශ කළේය.

“කංජිපානි රටින් පැන ගිය හැටි දන්නේ ඔහු වෙනුවෙන් පෙනීසිටින නීතිඥවරු පමණයි. අපි දන්නවා අපරාධකාරයන්ගෙන් කෝටි ගණන් මුදල් උපයන නීතීඥවරු කිහිපදෙනෙක් ඉන්නවා” යැයි ඇමැති අලස් ජනමාධ්‍ය වෙත අදහස් දක්වමින් පැවැසීය.

“අපි මේ නීතීඥවරුන්ගෙන් සමහරෙකුගෙන් ප්‍රශ්න කළ විට ඔවුන් පාපොච්චාරණය කළේ තමන් කංජිපානි කැටුව ගොස් බෝට්ටුවකින් පැනයාමට පහසුකම් සැලසූ බවයි. සියලුම නීතීඥයින් එක සමාන නොවූවත්, ඇතැම් නීතිඥයින් අපරාධකරුවන්ගෙන් ප්‍රයෝජන ලබන බව මෙයින් පැහැදිලි වෙනවා. සමහර නීතීඥවරු ඉන්නවා මත්ද්‍රව්‍ය නඩු වෙනුවෙන් පෙනී සිටීම ප්‍රතික්ෂේප කරනවා,” ඔහු සඳහන් කළේය.

මේ අතර, අතුරුගිරිය වෙඩිතැබීමේ සිද්ධියට සම්බන්ධ සැකකරුවන් වැඩි පිරිසක් පොලිසිය විසින් අත්අඩංගුවට ගෙන ඇති බව ඇමැතිවරයා ප්‍රකාශ කළේය.

වෙඩිතැබීම සිදුකළ තුවක්කුකරුවන් දෙදෙනා හඳුනාගෙන ඇති බව හෙළිකළ ඇමැතිවරයා, ඔවුන් වෘත්තීය වෙඩික්කරුවන් බවට පොලිසිය සැකකරන බවද පැවසීය.

කෙසේවෙතත්, දැනට පවතින පරීක්ෂණ උපුටා දක්වමින් ඔහු ඔවුන්ගේ අනන්‍යතාව හෙළිකිරීම ප්‍රතික්ෂේප කළේය.

ක්ලබ් වසන්තගේ ආදායම් මාර්ග සහ අයථා ලෙස ඉපැයීම් ගැන පවතින චෝදනා පිළිබඳව ඇමැතිවරයාගෙන් ප්‍රශ්න කළ විට, “අපි විශ්වාස කරනවා ඔහු සමාජ ශාලා කිහිපයක් පවත්වාගෙන ගියා කියලා. නමුත් ඔහු මිය යන විට බංකොලොත් වී සිටි බව පරීක්‍ෂණවලින් හෙළි වී තිබෙනවා.” යැයි සඳහන් කළේය.

මේ අතර, මියගිය පාතාල නායක මාකඳුරේ මධුෂ්ගෙන් ක්ලබ් වසන්තට මුදල් ලැබී ඇති බවට එල්ල වන ප්‍රකාශවලට ප්‍රතිචාර දක්වමින් ඇමැති අලස් කියාසිටියේ පරීක්ෂණවලින් එම වාර්තා අනාවරණය වී නොමැති බවයි.

මධුෂ් සහ කංජිපානි ඉම්රාන් ඩුබායිහිදී අත්අඩංගුවට ගනු ලැබුවේ ක්ලබ් වසන්ත විසින් ලබාදුන් තොරතුරක් මත බවට වාර්තා වූ කරුණු පැහැදිලි කරමින් ඇමැතිවරයා කියාසිටියේ ක්ලබ් වසන්ත විසින් ලබාදුන් තොරතුරු මත මධුෂ් අත්අඩංගුවට නොගත් බවයි.