ඉරාන සම්භවයක් ඇති ඛනිජ රසායනික නිෂ්පාදන වෙළඳාම් කිරීම සම්බන්ධයෙන් එක්සත් ජනපද භාණ්ඩාගාරයේ සම්බාධක හේතුවෙන් අනුකූලතා සමාලෝචනය කරන තෙක් ඩුබායි පදනම් කරගත් ස්ලොගල් එනර්ජි සමාගමේ මෙහෙයුම් අත්හිටුවා ඇති බව ලාෆ්ස් ගෑස් සමාගම ඊයේ පැවසීය.

“අඛණ්ඩතාව, විනිවිදභාවය සහ අන්තර්ජාතික නියාමන රාමුවලට අනුකූල වීම සඳහා ලාෆ්ස් ගෑස් එහි නොසැලෙන කැපවීම නැවත තහවුරු කරයි,” යනුවෙන් සමාගම නිවේදනයක් නිකුත් කරමින් කියා සිටියේය.

ශ්‍රී ලංකාවට සහ බංග්ලාදේශයට ඉරාන ද්‍රව පෙට්‍රෝලියම් ගෑස් (LPG) නැව්ගත කිරීම් මිලදී ගැනීම සහ විකිණීම සම්බන්ධයෙන් චෝදනා කරමින් එක්සත් ජනපද විදේශ වත්කම් පාලන කාර්යාලය පසුගිය සතියේ ස්ලොගල් එනර්ජි ඩීඑම්සීසී නම් කළේය.

“ස්ලොගල් එනර්ජි කිසි විටෙකත් සම්බාධක ඇති රටවල සම්භවයක් ඇති නිෂ්පාදන සම්බන්ධ කිසිදු වෙළඳාමක දැනුවත්ව නිරත වී හෝ පහසුකම් සපයා නැත.” යනුවෙන් ලාෆ්ස් ගෑස් සමාගම පවසයි.

සියලුම ගනුදෙනු අන්තරජාතික වෙළඳ පිළිවෙත්වලට අනුකූලව සිදු කර ඇති බවත්, සම්භවය පිළිබඳ සහතික සහ නීත්‍යනුකූල සැපයුම් ප්‍රභවයන් සත්‍යාපනය කරන ‘ඔබේ ගනුදෙනුකරු දැනගන්න’ (KYC) ලියකියවිලි මගින් සහාය දක්වන බවත් සමාගම පැවසීය.

ස්ලොගල් එනර්ජි හි සියලුම වාණිජ මෙහෙයුම් නවතා දමා ඇති බවත්, එක්සත් ජනපද සම්බාධක උපදේශකගේ සහාය ඇතිව නීතිමය සහ අනුකූලතා සමාලෝචනයක් සිදුවෙමින් පවතින බවත් ලාෆ්ස් සමාගම පැවසීය.

විධායක නියෝගය 13902 යටතේ එක්සත් ජනපද භාණ්ඩාගාරයේ විශේෂයෙන් නම් කරන ලද ලැයිස්තුවෙන් ස්ලොගල් එනර්ජි ඉවත් කිරීම සඳහා පෙත්සමක් ඉදිරිපත් කිරීමට සමාගම සැලසුම් කරයි.

දේශීය ද්‍රව පෙට්‍රෝලියම් ගෑස් බෙදා හැරීමේ ව්‍යාපාරයට මෙමගින් කිසිදු බලපෑමක් සිදු නොවන බව ලාෆ්ස් සමාගම තහවුරු කළේය.