මහාධිකරණයේ නඩු විභාගයට පෙර පැවති නඩුව පිළිබඳ පූර්ව නඩු විභාගයේදී අල්ලස් හෝ දූෂණ චෝදනා විමර්ශන කොමිෂන් සභාව විසින් ඉදිරිපත් කරන ලද කරුණු 31න් තුනක් චූදිත හිටපු බලශක්ති අමාත්‍ය කුමාර ජයකොඩි පිළිගෙන තිබේ.

ඒ අනුව, ජයකොඩි තමාට එරෙහිව එල්ල වී ඇති චෝදනාවලට අදාළ කාල සීමාව තුළ ලංකා පොහොර සමාගමේ සේවය කළ බවත්, සමාගමේ ප්‍රසම්පාදන කමිටුවේ සාමාජිකයකු බවත් පිළිගෙන තිබේ.

නඩු විභාගය අතරතුර අල්ලස් හෝ දූෂණ චෝදනා විමර්ශන කොමිෂන් සභාව විසින් ඉදිරිපත් කරන ලද අනෙකුත් කරුණු සළකා බැලීමට තීරණය කරන ලදී.

විත්තිකරු පිළිගත් කරුණු සනාථ කිරීම සඳහා ලේඛනගත සාක්ෂි ඉදිරිපත් කරන ලෙස මහාධිකරණ විනිසුරු රශාන්ත ගොඩවෙල විත්තිකරුට නියෝග කළේය.

නඩුවේ සාක්ෂි ජුනි 17 වැනිදා සිට විභාග කෙරේ.

එදිනට පැමිණිල්ලේ සාක්ෂිකරුවන් දෙදෙනෙකු අධිකරණයේ සාක්ෂි දීමට නියමිතය.

පැමිණිල්ල මෙහෙයවන අල්ලස් හෝ දූෂණ චෝදනා විමර්ශන කොමිෂන් සභාවේ සහකාර අධ්‍යක්ෂ අසිත ඇන්තනි ප්‍රකාශ කළේ පැමිණිල්ලට සාක්ෂි ඉදිරිපත් කිරීමට දින හයක් හෝ හතක් අවශ්‍ය වන බවයි.

තමන්ගේම සාක්ෂි ඉදිරිපත් කිරීමට විත්තිකරු දින තුනක් ඉල්ලා ඇත.

2016 දී ලංකා පොහොර සමාගමේ ප්‍රසම්පාදන කළමනාකරු ලෙස සේවය කරමින් සිටියදී පෞද්ගලික සමාගමකට අයුතු මූල්‍ය ලාභ ඉපැයීමට පහසුකම් සැලසීම සහ රජයට රුපියල් මිලියන 8.8කට වඩා පාඩුවක් සිදු කිරීම යන චෝදනා යටතේ අල්ලස් කොමිසම හිටපු අමාත්‍යවරයාට එරෙහිව අධිචෝදනා ගොනු කර ඇත.

ඔහු දැනට ඇප මත නිදහස්ව සිටී.