අධිකරණයේ විභාග වෙමින් පවතින නිශ්චිත නඩු පදනම් කරගනිමින් පාර්ලිමේන්තු මන්ත්‍රීවරුන් අධිකරණය සහ විනිසුරුවරුන්ගේ හැසිරීම පිළිබඳව කරන ප්‍රකාශ සම්බන්ධයෙන් නීතිඥ සාමූහිකය දැඩි කනස්සල්ල පළකර තිබේ.

අධිකරණයේ ස්වාධීනත්වය සහ ඒකාග්‍රතාව පිළිබඳ ප්‍රශ්න මතු කරන මැති ඇමතිවරුන් විසින් කරන ලද ප්‍රකාශ ඇතුළුව කනස්සල්ලට පත් වූ අවස්ථා කිහිපයක් නීතිඥ සාමූහිකය විසින් පෙන්වාදී ඇත.

කථානායක මහින්ද යාපා අබේවර්ධන සහ ජනාධිපති රනිල් වික්‍රමසිංහ යන අයද, විශේෂ නඩු විභාග කිරීමට පෙර පවා අධිකරණයේ අධිකරණ බලය සීමාකරන ප්‍රකාශයන් සිදු කළ බව ද නීතිඥ සාමූහිකය සඳහන් කරයි.

අධිකරණයේ ස්වාධීනත්වයට සහ නීතියේ ආධිපත්‍යයට එල්ල වන තර්ජන හමුවේ අවධානයෙන් සිටින ලෙස එම සංවිධානය නීති වෘත්තිකයන්ගෙන් ඉල්ලා සිටී.