October 21, 2026
ළමා පෝෂණය නංවාලීමට සහ ළදරු සෞඛ්‍යය ආරක්ෂා කිරීමේ උත්සාහයක් ලෙස, මාස හයක් දක්වා වයසැති දරුවන් සඳහා වන ළදරු ආහාර නිෂ්පාදනවලට ඇතැම් සීනි වර්ග එකතු කිරීම තහනම් කිරීමට ඉන්දියාව යෝජනා කර තිබේ.
ඉන්දීය ආහාර සුරක්ෂිතතා සහ ප්‍රමිති අධිකාරිය විසින් ළදරු පෝෂණ නිෂ්පාදන සඳහා සුක්‍රෝස් සහ ෆෘක්ටෝස් එකතු කිරීම තහනම් කිරීම අරමුණු කරගත් කෙටුම්පත් රෙගුලාසි ප්‍රකාශයට පත් කර ඇත.
ළමා වියේ මුල් අවධියේදී අනවශ්‍ය ලෙස සීනිවලට නිරාවරණය වීම අවම කිරීම අරමුණු කරගනිමින් මෙම යෝජිත සංශෝධනය ඔක්තෝබර් 16 වැනි දින ඉන්දියානු ගැසට් පත්‍රයේ පළ කර තිබේ.
පවතින රෙගුලාසි යටතේ, කාබෝහයිඩ්‍රේට් මූලාශ්‍ර ලෙස අවශ්‍ය විටෙක සීමිත ප්‍රමාණවලින් සුක්‍රෝස් සහ ෆෘක්ටෝස් එකතු කිරීමට නිෂ්පාදකයන්ට අවසර දී ඇත. කෙසේ වෙතත්, යෝජිත වෙනස්කම් මඟින් මාස හයක් දක්වා වයසැති දරුවන් සඳහා වන නිෂ්පාදනවලට ඒවා එකතු කිරීම සම්පූර්ණයෙන්ම තහනම් කරනු ඇත.
ළදරු ආහාර නිෂ්පාදන නිසි පෝෂණ ප්‍රමිතීන්ට අනුකූල වන බව තහවුරු කිරීමටත්, ළමා ස්ථුලභාවය සහ ඒ ආශ්‍රිත සෞඛ්‍ය අවදානම් ඇතුළුව මුල් අවධියේදී සීනි පරිභෝජනයට සම්බන්ධ සෞඛ්‍ය ගැටලු විසඳීමටත් මෙම පියවර අරමුණු කරගත් බව ඉන්දියාවේ සෞඛ්‍ය සහ පවුල් සුභසාධන අමාත්‍යාංශය ප්‍රකාශ කරයි.
පළමු මාස හය තුළ පමණක් මව්කිරි දීම දිරිමත් කරන මහජන සෞඛ්‍ය නිර්දේශවලටද මෙම මුලපිරීම සහයෝගය දක්වන බව අමාත්‍යාංශය පැවසීය.
මෙම කෙටුම්පත් රෙගුලාසි මහජන අදහස් විමසීම සඳහා විවෘත කර ඇති අතර, විරෝධතා සහ යෝජනා ඉදිරිපත් කිරීම සඳහා පාර්ශ්වකරුවන්ට දින 60ක කාලයක් ලබා දී ඇත.
මෙම යෝජිත තහනම ක්‍රියාත්මක වන්නේ රෙගුලාසි අවසන් කර බලාත්මක කිරීමෙන් පසුව පමණි.
