නිල සංචාරයක් සඳහා ශ්‍රී ලංකාවට පැමිණ සිටි ජපානයේ විදේශ කටයුතු ඇමැති යෝකෝ කමිකාවා ජපානයේ සහයෝගයෙන් කෙරෙන කොළඹ වරායේ සහ කොළඹ තටාකාංගනයේ සංචාරයක නිරත විය.

ජපාන විදේශ කටයුතු අමාත්‍යාංශයට අනුව, ශ්‍රී ලංකා වරාය අධිකාරියේ කළමනාකාර අධ්‍යක්ෂවරයා විසින් ඉන්දියන් සාගර කලාපයේ සැපයුම්වල වරායේ වැදගත්කම සහ ජපන් ආධාර ඇතිව ඉදිකර ඇති පහසුකම් මුළු වරායම පෙනෙන වරායේ පාලන කුළුණේ සිට පසුගිය සෙනසුරාදා පැහැදිලි කර තිබේ.

ජපාන විදේශ ඇමැතිවරයාගේ කොළඹ වරායේ සංචාරය ද්විපාර්ශ්වික සබඳතා ශක්තිමත් කරන බව ශ්‍රී ලංකා වරාය අධිකාරිය පවසයි.

ශ්‍රී ලංකාව ඉන්දියන් සාගරයේ මුහුදු මංතීරුවල උපායමාර්ගික ස්ථානයක පිහිටා ඇති වැදගත් හවුල්කරුවකු බවත් ජපානය ඉන්දීය සාගර කලාපීය සංගමයේ සභාපතිවරයා වන ශ්‍රී ලංකාව සමඟ සක්‍රීයව කටයුතු කිරීමට කැමති බවත් ඇමැති කමිකාවා මීට පෙර ප්‍රකාශ කර තිබිණි.

ශ්‍රී ලංකාව සමඟ සමුද්‍රීය ක්ෂේත්‍රයේ සහයෝගීතාව තවදුරටත් ශක්තිමත් කර ගැනීමට ජපානය අපේක්ෂා කරන බවත්, මේ සම්බන්ධයෙන් සමුද්‍ර ප්‍රස්ථාර සම්පාදනය සඳහා සෝනාර් යන්ත්‍රයක් සහිත යාත්‍රාවක් ලබාදීමට ජපානය තීරණය කර ඇති බවත් ඇමැති කමිකාවා ප්‍රකාශ කර තිබේ.

ඉන්දියන් සාගරයේ සාමය සහ ස්ථාවරත්වය සඳහා අඛණ්ඩව දායකත්වය ලබාදීමට ශ්‍රී ලංකාව කැපවී සිටින බව මෙරට විදේශ ඇමැති අලි සබ්රි ද ප්‍රකාශ කර ඇත.