July 14, 2026
මෑතකදී මීගමුව බන්ධනාගාරය තුළ ඇති වූ මාරාන්තික ගැටුම පිටුපස කිසියම් කුමන්ත්රණයක් තිබුණේද යන්න සෙවීම සඳහා මේ වන විට විමර්ශන ආරම්භ කර ඇති බව සෞඛ්ය හා ජනමාධ්ය නියෝජ්ය අමාත්ය වෛද්ය හංසක විජේමුණි ප්රකාශ කර තිබේ.
නියෝජ්ය අමාත්යවරයා මේ බව කියා ඇත්තේ, මහනුවර දිස්ත්රික්කයේ පැවැති සාකච්ඡාවකට එක්වෙමිනි.
එහිදී ඔහු සඳහන් කර ඇත්තේ, ක්ෂණික පියවරක් ලෙස, මාස කිහිපයක කාලයක් සඳහා පමණක් මහනුවර පැරණි බෝගම්බර බන්ධනාගාර පරිශ්රයේ සහ ගාල්ල පැරණි මහමෝදර රෝහල් පරිශ්රයේ තාවකාලිකව නව බන්ධනාගාර දෙකක් පිහිටුවීමට තීරණය කර ඇති බවයි.
බන්ධනාගාරවල පවතින අධික තදබදයට රජය විසින් විසඳුම් හඳුන්වා දුන් වහාම මෙම තාවකාලික බන්ධනාගාර දෙකම වසාදමන බව ද නියෝජ්ය අමාත්යවරයා වැඩිදුරටත් පවසා ඇත.
“මීගමුව බන්ධනාගාරයේ ඇති වූ ගැටුම පිටුපස කුමන්ත්රණයක් තිබුණේද යන්න සෙවීමට දැනට විමර්ශන ක්රියාත්මකයි. අපට නිශ්චිත ප්රකාශයක් කළ හැක්කේ එම විමර්ශනවල ප්රගතිය මත පදනම්ව පමණයි” යැයි ඔහු සඳහන් කර ඇත.
බන්ධනාගාරවල පවතින අධික තදබදය දිගුකාලීන ගැටලුවක් බවත්, එමඟින් බන්ධනාගාර පද්ධතිය තුළ අභියෝග රැසක් මතු වී ඇති බවත් පෙන්වා දී ඇති නියෝජ්ය අමාත්යවරයා, උසාවි කටයුතු අනවශ්ය ලෙස ප්රමාද වීම, විමර්ශන වාර්තා නොලැබීම සහ මත්ද්රව්ය ආශ්රිත අත්අඩංගුවට ගැනීම් ඉහළ යාම බන්ධනාගාර තදබදය වැඩිවීමට ප්රධාන හේතු වී ඇති බව ද ප්රකාශ කර තිබේ.
ගාල්ල මහමෝදර පැරණි රෝහල සහ බෝගම්බර පරිශ්රය ස්ථිර බන්ධනාගාර ලෙස පවත්වාගෙන යාමට රජයේ අදහසක් නොමැති බවත්, මේ සඳහා වෙනම සැලසුම් ක්රියාත්මක වන බවත් ඔහු යළිත් අවධාරණය කර ඇත.
මේ අතර, පැරණි බෝගම්බර බන්ධනාගාර පරිශ්රයේ නව බන්ධනාගාරයක් පිහිටුවීමට අදාළ ගැසට් නිවේදනය ජූලි 8 වැනිදා අධිකරණ හා ජාතික ඒකාබද්ධතා අමාත්ය හර්ෂණ නානායක්කාර විසින් නිකුත් කරනු ලැබීය.
ගාල්ල මහමෝදර රෝහල් පරිශ්රයේ නව බන්ධනාගාරයක් පිහිටුවීමට අදාළ ගැසට් නිවේදනය ද ජූලි 7 වැනිදා නිකුත් කර ඇත.
