ඉන්දීය අග්‍රාමාත්‍ය නරේන්ද්‍ර මෝදි එළඹෙන දෙසැම්බර් මාසයේදී පැවැත්වීමට නියමිත යුරෝපා සංගම් රාජ්‍ය නායක සමුළුවට සහභාගී වීමට සැලසුම් කරමින් සිටින බව වාර්තා වේ.

මෙම සංචාරය සිදුවීමට නියමිතව ඇත්තේ ඉන්දියාව සහ යුරෝපා සංගමය අතර නිදහස් වෙළඳ ගිවිසුමකට අදාළ සාකච්ඡා සාර්ථකව අවසන් කිරීමෙන් සහ ඉකුත් ජනවාරි මාසයේදී ආරක්ෂක හා අරක්ෂක සහයෝගිතා ගිවිසුමකට අත්සන් තැබීමෙන් පසුවය.

දෙසැම්බර් 17 සහ 18 යන දිනවල බ්‍රසල්ස් නුවර පැවැත්වෙන යුරෝපා කවුන්සිලයේ වසරේ අවසාන නිල රාජ්‍ය නායක හමුවට අගමැති මෝදි සම්බන්ධ වීමට නියමිත බව වාර්තා වේ.

කෙසේ වෙතත්, මෙම සංචාරය මෙතෙක් නිල වශයෙන් තහවුරු කර නොමැති අතර සැලසුම් වෙනස් වීමට ද ඉඩකඩ පවතී.

ජනගහනය බිලියන 2 ක වෙළඳපොළක් විවෘත කරන, දළ දේශීය නිෂ්පාදිතයෙන් පස්ගුණයකටත් වඩා වැඩි ප්‍රමාණයකට හිමිකම් කියන මෙම වෙළඳ ගිවිසුම මෙතෙක් නිල වශයෙන් අත්සන් කර නොමැති අතර, එය පූර්ණ වශයෙන් බලාත්මක කිරීමට පෙර කළ යුතු අවසාන පියවර වන්නේ ද අත්සන් තැබීමයි.

අගමැති මෝදිගේ මෙම සංචාරය අදාළ ගිවිසුමට අත්සන් තැබීමට සුදුසු අවස්ථාවක් කරගත හැකි වුවද, ඊට යුරෝපා සංගමයේ සාමාජික රටවල පූර්ණ අනුමැතිය හිමිවීමට තවමත් ඉතිරිව ඇත.

මේ සම්බන්ධයෙන් අදහස් දැක්වීම සඳහා බ්‍රසල්ස් හි පිහිටි ඉන්දීය තානාපති කාර්යාලය මෙතෙක් ක්ෂණික ප්‍රතිචාරයක් දක්වා නොමැත.