September 30, 2026
ඉන්දියාවෙන් ලැබුණු අන්යෝන්ය නීතිමය ආධාර සන්නිවේදනයකට අනුව, කුප්රකට ක්රිෂ් ගොඩනැගිලි ව්යාපෘතිය සඳහා නීතිවිරෝධී මුදල් භාවිත කර ඇති බවට කරුණු අනාවරණය වී ඇති බව අල්ලස් හෝ දූෂණ චෝදනා විමර්ශන කොමිෂන් සභාව කොළඹ ප්රධාන මහේස්ත්රාත් අධිකරණයට දැනුම් දී තිබේ.
අල්ලස් කොමිසමේ සහකාර නීති අධ්යක්ෂිකා අමා විජේසිංහ පැවසුවේ, එකී ව්යාපෘතිය සම්බන්ධයෙන් සිදුකරන ඒකාබද්ධ විමර්ශනයක කොටසක් ලෙස මෙම තොරතුරු අපරාධ පරීක්ෂණ දෙපාර්තමේන්තුව භාරයේ පවතින බවයි.
නාගරික සංවර්ධන අධිකාරියට අයත් කොළඹ කොටුවේ පිහිටි ඉඩමක් ක්රිෂ් ට්රාන්ස්වර්ක්ස් කොළඹ (පෞද්ගලික) සමාගම වෙත බදුදීමට පහසුකම් සැලසීම වෙනුවෙන් නිමල් පෙරේරා හරහා නාමල් රාජපක්ෂ රුපියල් මිලියන 70 ක මුදලක් ලබාගෙන ඇති බවට චෝදනා එල්ල වී ඇති බව කොමිසම අධිකරණයට වැඩිදුරටත් පැවසීය. එමෙන්ම, අදාළ රාජ්ය ආයතන මගින් අසාමාන්ය ලෙස වේගයෙන් ඊට අදාළ අනුමැතීන් ලබාදී ඇති බව විමර්ශකයන් විසින් අනාවරණය කරගෙන ඇති බව ද නිලධාරිනිය සඳහන් කළාය.
නාමල් රාජපක්ෂට එරෙහි නඩුව අධිකරණය හමුවේ කැඳවූ අවස්ථාවේදී මෙම චෝදනා ඉදිරිපත් කෙරිණි.
එහිදී ඔහුගේ නීතිඥවරයා දූෂණ විරෝධී පනත යටතේ ඉදිරිපත් කර ඇති සහතික පත්රයේ වලංගුභාවය අභියෝගයට ලක්කරමින් කියාසිටියේ චෝදනා ගොනුකර ඇත්තේ පූර්ව අල්ලස් පනත යටතේ බවයි.
ඊළඟ නඩු වාරයේදී ඇප ඉල්ලීමක් ඉදිරිපත් කරන ලෙස නියෝග කළ අධිකරණය, ඔක්තෝබර් 13 වැනිදා දක්වා නාමල් රාජපක්ෂව රක්ෂිත බන්ධනාගාරගත කිරීමට නියෝග කළේය.
