රුපියල් මිලියන 454 කට ආසන්න වීථි වටිනාකමකින් යුත් කොකේන් සහ එක්ස්ටසි (Ecstasy) පෙති තොගයක් සමඟ ඉන්දියානු ජාතිකයෙකු කටුනායක බණ්ඩාරනායක අන්තර්ජාතික ගුවන්තොටුපොළේදී ශ්‍රී ලංකා රේගු නිලධාරීන් විසින් අත්අඩංගුවට ගෙන ඇත.

ඊයේ (28) කටුනායක ගුවන්තොටුපොළේදී ශ්‍රී ලංකා රේගු මත්ද්‍රව්‍ය පාලන ඒකකයේ නිලධාරීන් විසින් සිදුකරන ලද පරීක්ෂාවකදී සැකකරු ළඟ තිබී මෙම මත්ද්‍රව්‍ය සොයාගෙන තිබේ.

වෘත්තියෙන් ඉංජිනේරුවරයකු වන 46 හැවිරිදි මෙම ඉන්දියානු ජාතිකයා පැරිස් නුවර සිට දෝහා හරහා දිවයිනට පැමිණ ඇති බව වාර්තා වේ.

වැඩිදුර විමර්ශන සඳහා ශ්‍රී ලංකා රේගු මත්ද්‍රව්‍ය පාලන ඒකකයේ නිලධාරීන් විසින් මෙම මගියා රඳවාගෙන ඇත.

අදාළ මගියාගේ ගමන් බෑග් පරීක්ෂා කිරීමේදී මෙම මත්ද්‍රව්‍ය සොයාගෙන ඇති අතර, පසුව සිදුකළ පරීක්ෂණවලදී ඒවා කොකේන් සහ එක්ස්ටසි පෙති බව තහවුරු වී තිබේ.

අත්අඩංගුවට ගත් තොගයට ඇස්තමේන්තුගත වීථි වටිනාකම රුපියල් මිලියන 256 ක් වන කොකේන් කිලෝග්‍රෑම් 5.121 ක් සහ රුපියල් මිලියන 198 ක වීථි වටිනාකමකින් යුත් එක්ස්ටසි පෙති 23,000 කට ආසන්න ප්‍රමාණයක් (බර කිලෝග්‍රෑම් 13.173 ක්) ඇතුළත් වේ.

ශ්‍රී ලංකා රේගුව මේ පිළිබඳව මූලික විමර්ශන පවත්වයි.

සැකකරු, අත්අඩංගුවට ගත් මත්ද්‍රව්‍ය සහ අනෙකුත් අදාළ නඩු භාණ්ඩ වැඩිදුර විමර්ශන සහ නීතිමය කටයුතු සඳහා පොලිස් මත්ද්‍රව්‍ය කාර්යාංශය වෙත භාරදීමට නියමිතව තිබිණි.