අප්‍රිකාවේ පවතින එබෝලා වෛරස් ව්‍යාප්තිය හමුවේ, අප්‍රිකානු රෝග පාලන හා වැළැක්වීමේ මධ්‍යස්ථානය වෙත කඩිනම් වෛද්‍ය ආධාර සහ ආරක්ෂිත කට්ටල ඇතුළත් පළමු තොගය ලබා දීමට ඉන්දියාව පියවර ගත්තේය.

මතු වෙමින් පවතින මෙම එබෝලා මහජන සෞඛ්‍ය හදිසි තත්ත්වයට මුහුණ දීම සඳහා අප්‍රිකාවට සහය වීමට ඉන්දියාව බැඳී සිටින බව විදේශ කටයුතු අමාත්‍ය එස් ජයිශංකර් X සමාජ මාධ්‍ය ජාලයේ සටහනක් තබමින් ප්‍රකාශ කර තිබේ.

“ඉන්දියාව අද දිනයේ Africa CDC වෙත කඩිනම් වෛද්‍ය ආධාර සහ ආරක්ෂිත කට්ටල ඇතුළත් පළමු තොගය පිටත් කර හැරියා. මතු වෙමින් පවතින එබෝලා මහජන සෞඛ්‍ය හදිසි තත්ත්වයට මුහුණ දීම සඳහා අප්‍රිකාවට සහය වීමට අප කැපවී සිටිනවා,” යනුවෙන් අමාත්‍ය ජයශංකර් X හි සටහන් කර ඇත.

එබෝලා රෝගය යනු මිනිසුන්ට වැළඳෙන දුර්ලභ නමුත් දරුණු මෙන්ම බොහෝ විට මාරාන්තික විය හැකි රෝගයකි.

මේ අතර, කොංගෝ රාජ්‍යය, උගන්ඩාව සහ දකුණු සුඩානය යන රටවල එබෝලා රෝගය ව්‍යාප්ත වෙමින් පවතින බවට වාර්තා වීමත් සමඟ, දැනට එම රටවල වෙසෙන හෝ එහි සංචාරය කරන ඉන්දීය පුරවැසියන්ට ප්‍රාදේශීය බලධාරීන් විසින් නිකුත් කරනු ලබන මහජන සෞඛ්‍ය උපදෙස් දැඩි ලෙස අනුගමනය කරන ලෙසත්, ඉහළ ආරක්ෂිත පියවරයන් අනුගමනය කරන ලෙසත් ඉන්දීය රජය උපදෙස් දුන්නේය.

ලෝක සෞඛ්‍ය සංවිධානය විසින් මෙම තත්ත්වය ජාත්‍යන්තර සැලකිල්ලට භාජනය විය යුතු මහජන සෞඛ්‍ය හදිසි තත්ත්වයක් ලෙස ප්‍රකාශයට පත් කර ඇත.

“කොංගෝ ප්‍රජාතන්ත්‍රවාදී ජනරජයේ සහ අනෙකුත් බලපෑමට ලක්වූ රටවල පවතින තත්ත්වය සැලකිල්ලට ගනිමින් සහ ලෝක සෞඛ්‍ය සංවිධානයේ නිර්දේශයන්ට අනුකූලව, නැවත දැනුම් දෙන තුරු කොංගෝ ප්‍රජාතන්ත්‍රවාදී ජනරජය, උගන්ඩාව සහ දකුණු සුඩානය වෙත අත්‍යවශ්‍ය නොවන සංචාරවලින් වැළකී සිටින ලෙස ඉන්දීය රජය සියලුම ඉන්දීය පුරවැසියන්ට උපදෙස් දෙයි,” යනුවෙන් සෞඛ්‍ය අමාත්‍යාංශය නිකුත් කළ නිවේදනයක දැක්වේ.

Bundibugyo වෛරස් ප්‍රභේදය නිසා ඇති වන එබෝලා රෝගී තත්ත්වයන් කිසිවක් ඉන්දියාවෙන් වාර්තා වී නොමැති බවද අමාත්‍යාංශය වැඩිදුරටත් සඳහන් කළේය.