මාර්තු මාසයෙන් අවසන් වූ මූල්‍ය වර්ෂය සඳහා ඉන්දියාවේ ආරක්ෂක අපනයන රුපියල් බිලියන 384.24ක් (ඇමරිකානු ඩොලර් බිලියන 4.11ක්) දක්වා ළඟා වී ඇති බවත්, එය පෙර වසරට සාපේක්ෂව 62%කට වඩා වැඩි වර්ධනයක් බවත් රජය ඉකුත් බ්‍රහස්පතින්දා ප්‍රකාශ කළේය.

2024 අප්‍රේල් සිට 2025 මාර්තු දක්වා කාලය තුළ ඉන්දියාව රුපියල් බිලියන 236.22ක් (ඩොලර් බිලියන 2.52ක්) වටිනා ආරක්ෂක උපකරණ අපනයනය කර ඇති අතර, 2025-2026 මූල්‍ය වර්ෂය සඳහා එම අපනයන රුපියල් බිලියන 148.02කින් ඉහළ ගොස් ඇති බව එම ප්‍රකාශයේ සඳහන් වේ.

මෙම කැපී පෙනෙන වර්ධනය මගින් ඉන්දියාවේ නිෂ්පාදිත ආරක්ෂක නිෂ්පාදන සඳහා පවතින ගෝලීය පිළිගැනීම සහ ජාත්‍යන්තර සැපයුම් දාමයන් සමඟ මෙම ක්ෂේත්‍රය වර්ධනය වෙමින් පවතින බව පෙන්නුම් කරන බව රජය පවසයි.

“එක් කලෙක ආයුධ සඳහා වෙනත් රටවල් මත යැපුණු හෝ ආනයනය කරන්නෙකු ලෙස ප්‍රසිද්ධව සිටි ඉන්දියාව, දැන් අපනයන අතින් ද වේගයෙන් ඉදිරියට යමින් සිටිනවා,” යැයි ආරක්ෂක අමාත්‍ය රාජ්නාත් සිං බ්‍රහස්පතින්දා පැවති දේශනයකදී පැවසීය.

ඉන්දියාව දැනට රටවල් 80කට අධික සංඛ්‍යාවකට ආරක්ෂක උපකරණ අපනයනය කරන බව රජය පවසයි.

මෑත වසරවලදී, තුවක්කු සහ ඩ්‍රෝන යානාවල සිට ප්‍රහාරක ජෙට් යානා සහ සබ්මැරීන දක්වා සියල්ල දේශීයව හෝ විදේශීය හවුල්කරුවන් සමඟ එක්ව නිෂ්පාදනය කිරීමට ඉන්දියාව පියවර ගෙන ඇත.

ස්ටොක්හෝම් ජාත්‍යන්තර සාම පර්යේෂණ ආයතනයේ (SIPRI) නවතම දත්ත වලට අනුව, ඉන්දියාව ලොව පස්වන විශාලතම මිලිටරි වියදම් කරන්නා වන අතර යුක්රේනයට පසුව ලොව දෙවන විශාලතම ආයුධ ආනයනය කරන්නා ද වේ.