September 3, 2026
බටහිර ආසියානු කලාපයේ පවතින නොසන්සුන්කාරී තත්ත්වය සමනය කිරීම සඳහා අනිවාර්යයෙන්ම සාකච්ඡා සහ රාජ්යදූත මට්ටමේ මැදිහත්වීම් අවශ්ය බව ඉන්දියාව සහ බෙල්ජියම පවසයි. නවදිල්ලි නුවරදී පැවැති ඉන්දීය අග්රාමාත්ය නරේන්ද්ර මෝදි සහ බෙල්ජියම් අග්රාමාත්ය බාර්ට් ඩි වේවර් අතර හමුවේදී මේ පිළිබඳව දීර්ඝ ලෙස සාකච්ඡා වී තිබේ.
කලාපීය අර්බුද හමුවේ වුවද ජාත්යන්තර මුහුදු ගමන් මාර්ගවල ආරක්ෂාව තහවුරු කිරීම සහ බාධාවකින් තොරව වෙළඳ නාවික කටයුතු පවත්වාගෙන යාම අත්යවශ්ය කරුණක් බව නායකයන් දෙපළ මෙහිදී අවධාරණය කළහ.
මෙම නිල හමුවෙන් අනතුරුව නිකුත් කළ ඒකාබද්ධ නිවේදනයේ සඳහන් වන්නේ, බටහිර ආසියාවේ වත්මන් ආරක්ෂක තත්ත්වය පිළිබඳව දෙරටේම දැඩි අවධානය යොමු වූ බවත්, ඕනෑම ගැටලුවක් සාමකාමී මාර්ගයෙන් විසඳා ගැනීමට දෙපාර්ශ්වයම කැපවන බවත්ය.
මීට අමතරව යුක්රේන අර්බුදය සම්බන්ධයෙන් ද මෙහිදී අදහස් හුවමාරු වූ අතර, එක්සත් ජාතීන්ගේ ප්රඥප්තියට සහ ජාත්යන්තර නීතියට ගරු කරමින්, සාකච්ඡා මාර්ගයෙන් සාධාරණ හා තිරසාර සාමයක් උදාකර ගැනීමට දරන උත්සාහයන් සඳහා ඉන්දියාවේ සහ බෙල්ජියමේ පූර්ණ සහයෝගය හිමිවන බව තහවුරු කෙරිණි.
ප්රජාතන්ත්රවාදය, නීතියේ ආධිපත්යය, මානව හිමිකම් සහ ස්ත්රී පුරුෂ සමානාත්මතාව වැනි පොදු අගයන් මත පදනම්ව ඉන්දියා-බෙල්ජියම් ද්වීපාර්ශ්වික සබඳතා තවදුරටත් ශක්තිමත් කිරීමට ද නායකයෝ තීරණය කළහ. විශේෂයෙන්ම වීසා සේවාවන් වඩාත් කාර්යක්ෂම කරමින් දෙරටේ ජනතාව අතර පවතින සබඳතා වර්ධනය කිරීමට ද මෙහිදී ප්රමුඛතාවක් හිමිවිය.
