වාහන ආනයනය සඳහා වෙන්කර ඇති ඉතිරි ඩොලර් මිලියන 200 භාවිත කිරීම සම්බන්ධයෙන් රජය කිසියම් කොන්දේසියක් පැනවූවහොත් දේශීය වාහන වෙළඳපොලේ මිල ගණන් සීග්‍රයෙන් ඉහළ යෑමට ඉඩ ඇති බව වාහන ආනයනකරුවන්ගේ සංගමයේ සභාපති ප්‍රසාද් මානගේ අනතුරු අඟවයි.

ජනමාධ්‍ය හමුවේ අදහස් දක්වමින් ඔහු පැවසුවේ, මහ බැංකුවේ මෑතකාලීන වාර්තාවලට අනුව, වාහන ආනයනය සඳහා මූල්‍ය ආයතන ඩොලර් මිලියන 800 කට ආසන්න වටිනාකමකින් යුත් ණයවර ලිපි දැනටමත් විවෘත කර ඇති බවයි.

වාහන ආනයනය නැවත ආරම්භ කිරීම සඳහා මුලින් ඇමෙරිකානු ඩොලර් බිලියනයක ප්‍රතිපාදන ලැබී තිබුණද, ඉතිරි අරමුදල් හිමිවීම මේ වනවිට අවිනිශ්චිත තත්වයකට පත්ව ඇති බව ද ඔහු සඳහන් කළේය.

ඉතිරි ඩොලර් මිලියන 200 සැළසුම් කළ පරිදි ආනයනය සඳහා ලබාදෙනවාද, නැතිනම් නව කොන්දේසි පනවන්නේද යන්න පැහැදිලි කිරීමට රජයේ නිලධාරීන් සමඟ ළඟදීම සාකච්ඡා කිරීමට බලාපොරොත්තු වන බව ද ඔහු පැවසුවේය.

එමෙන්ම රජය එවැනි සීමාවන් හඳුන්වා දෙන්නේ නම්, වෙළෙඳපොළ ඉල්ලුම සහ සැපයුම මත රඳාපවතින බැවින් දේශීය වාහන මිල ගණන් යළි ඉහළ යෑම වැළැක්විය නොහැකි බව ද ප්‍රසාද් මානගේ පෙන්වාදෙයි.

දැනට පවතින හිඟයට පිළියම් යෙදීම සඳහා අවම වශයෙන් වාහන 9,000ක් දැනටමත් මෙරටට ගෙන්වා ගෙන ඇති බවද ඔහු සඳහන් කළේය.

වාහන එකලස් කිරීමේ කර්මාන්ත ශාලා සඳහා බදු සහන සඳහා ප්‍රමුඛත්වය දීමට රජය ගත් තීරණයට ද ඔහු විරෝධය පළකළේය.

මෙම එකලස් කිරීමේ කම්හල් සඳහා වාහන අමතර කොටස් ආනයනය කිරීම වෙනුවෙන් සැලකිය යුතු විදේශ විනිමය ප්‍රමාණයක් වැයකර ඇති නමුත් එය අපනයනයට දායක වී නැති අතර, ඉන්ධන කාර්යක්ෂම වාහන නිෂ්පාදනය නොකළ බව ද ඔහු පැවැසීය.

අපනයනය ඉලක්ක කරගත් මෙහෙයුම් සඳහා බදු සහන ලබාදෙන බවට මුලින් පොරොන්දු වූ මෙම එකලස් කිරීමේ ව්‍යාපාර තුළින් සැබෑ වාසියක් අත්වූයේද යන්න පිළිබඳව පරීක්ෂණයක් පවත්වන ලෙස ද වාහන ආනයනකරුවන්ගේ සංගමයේ සභාපතිවරයා රජයෙන් ඉල්ලා සිටියේය.

වාහන ආනයනය සඳහා අරමුදල් ඵලදායි ලෙස සහ අනවශ්‍ය සීමාකිරීම්වලින් තොරව කළමනාකරණය නොකළහොත්, වෙළඳපොළ නැවත වරක් අස්ථාවරත්වයක් සහ මිල ඉහළ යෑමක් සිදුවිය හැකි බව ද ඔහු අනතුරු ඇඟවීය.